DILI, 14 setembru 2023 (TATOLI)—Ai-moruk hapara fuma, iha tipu rua, hanesan Patch 4mg no 2mg (ai-moruk taka ba isin) no Nicotine Gum 2mg no 4mg (ai-moruk nata de’it ka sumingal), iha Sentru Hapara Fuma Formoza, Dili, agora mamuk ka stock out.
“Daudaun ne’e estoke ai-moruk mamuk, hahú iha fulan juñu to’o agora,” Responsavel Sentru Hapara Fuma, Médiku jerál, Eldino de Castro Rangel, informa ba TATOLI, iha nia kna’ar fatin Formoza, ohin.
Ho estoke ne’ebé mamuk, tuir Médiku Eldino de Castro Rangel katak fumadór sira ne’ebé mak ho dependénsia aas ho natoon ne’e bele fuma fila fali tanba sira difisil para mesak tanba ai-moruk taka ba isin (Patch 4mg no 2mg) no mós ai-moruk nata deit ka sumingal (Nicotine Gum 2mg no 4mg) la iha.
Notísia relevante:MS tau millaun $5.4 iha OR sosa ai-moruk
Responsavel ne’e dehan, pedidu halo ona ba Ministériu Saúde (MS) ho Organizasaun Mundiál Saúde (OMS) iha Timor- Leste maibé sira informa katak ai-moruk sira ne’e iha prosesu nia laran no tempu badak sei to’o iha Timor- Leste hodi uza halo atendimentu ba fumadór sira ne’ebé hakarak hapara fuma.
Fumadór 938 susesu para fuma
Responsavel Sentru Hapara fuma ne’e relata, dezde 2021 to’o agora fumadór hamutuk 938 mak susesu ona para fuma.
“Durante ita estabelese fatin sentru hapara fuma iha Formoza no ema ne’ebé ita rejistu hamutuk 1.230 husi númeru ne’e fumadór 980 mak susesu para fuma,” nia esplika.
Pesoál saúde ne’e hatutan, pasiente balun hahú fuma fila fali entaun sira mai iha fatin ne’e hodi kontinua tratamemtu no balun lakon informsaun signifika lakohi mai ona.
“Fumadór ne’ebé lakon informasaun ka la mai fila fali ne’e hamutuk 172 no fumadór ne’ebé fuma fila fali hamutuk 124,” Responsavel Sentru Hapara Fuma, Médiku jerál, Eldino de Castro Rangel.
Médiku ne’e esplika, pasiente sira ne’e maioria idade 17 to’o 40 ne’ebé mai vizita fatin hapara fuma Formoza hodi hakarak para fuma ida ne’e tanba fuma ne’e estraga saúde.
Notísia relevante:Sentru hapara fuma funsiona iha munisípiu haat
Sentru Hapara Fuma estabelese ona fatin hapara fuma iha Liquiça, Ainaro, Ermera no Rejiaun Adminsitrativu Oecusse Ambeno (RAEOA) nune’e tempu-badak Ministeriu Saúde sei estabelese tan ba munisípiu sira seluk.
Iha fatin hanesan, Xefe Departamentu Moras Lahada’et iha Ministériu Saúde, Hector da Costa Perreira rekoñese, ai-moruk ba fumadór sira hotu iha sentru hapara fuma Formoza tanba ne’e OMS halo ona esforsu hodi sosa ai-moruk; iha ona prosesu nia laran.
“Ita servisu hamutuk ho OMS entaun ai-moruk sosa ona daudaun ne’e iha ona prosesu nia laran maizmenus fulan ida ne’e, lae, fulan oin, ai-moruk to’o ona ita-nia rain hodi halo tratamentu ba fumadór sira ne’ebé hakarak para fuma,” Hector da Costa Perreira konklui.
Notísia relevante:OMS kompromete estende servisu hapara fuma iha munisípiu hotu
Jornalista: Felicidade Ximenes
Editór: Rafael Ximenes de A. Belo
