COVALIMA, 22 setembru 2023 (TATOLI)–Servisu Munisipál Obra Públika (SMOP) Covalima halo lavantamentu dadus ba estrada no ponte ne’ebé hetan estragu hosi dezastre naturál (udan boot 03-04 jullu 2023) iha Covalima finaliza ona no submete on aba nasionál.
Notísia Relevante: 2022-2023: APC rejista vítima dezastre naturál iha Covalima hamutuk 139
“Ita finaliza ona halo lavantamentu dadus no ita submete ona dadus ba iha nasionál,” Diretór Servisu Munisipál Obra Públika Covalima, Alberto Cardoso, hateten ba Agência Tatoli, iha nia kna’ar fatin, Santa Rosa, sesta ne’e.
Foin lalais ne’e ekipa nasionál mós halo ona verifikasaun kona-ba levantamentu dadus ponte no estrada ne’ebé hetan estraga hosi dezastre naturál no Vise Ministru Obra Públiku rasik mós tun direta ona hodi haree kondisaun ponte kotu iha Lomea Raiketan no seluk tan.
“Ami iha munisípiu fó kompeténsia tomak ba iha nasionál no bainhira mak atu loke konkursu públika ka oinsa ne’e, ita hein de’it,” nia dehan.
Servisu Munisipal Obra Públika mós simu relatóriu autoridade hosi postu administrativu ne’ebé afetadu dazastre natural ne’ebé estraga estrada no ponte iha postu administrativu Fatululik, Zumalai, Maucatar, Suai, Tilomar no Fohorem.
Tuir dadus, durante udan boot iha loron 03-04 fulan-jullu tinan 2023 ponte ne’ebé hetan estragu iha munisípiu Covalima hanesan ponte Lomea lokaliza iha suku Beco, postu Suai, entre suku Tashilin, postu Zumalai, ponte Raiketan lokaliza iha suku Labarai postu Suai entre suku Belekasak, postu Maucatar, munisípiu Covalima.
Entretantu, iha dezastre natural ne’ebé estraga ponte no estrada, halo komunidade mós sai vítima tanba dezastre naturál tipu rai halai no inundasaun iha munisípiu Covalima xefe-família 957 maiória vítima dezastre naturál ho tipu inundasaun ne’ebé akontese iha postu administrarivu hitu.
Hosi dadus xefe família 957 ne’e iha xefe família 168 mak tama iha lista atu fó apoiu materiál rekuperasaun, tanba hosi uma-kain 168 ne’e tama iha kategória tipu dezastre aat totál, no kategoria aat natoon no aat kmaan ne’e Governu distribui ona materiál rekuperasaun no subsídiu mão de obra ba vítima sira.
Jornalista : Celestina Teles
Editór : Cancio Ximenes
