DILI, 23 setembru 2023 (TATOLI) – Modalidade hosi Federasaun Boxe Amadora Timor-Leste (FBATL) ho nia atleta hamutuk na’in haat la konsege kompete iha eventu internasionál Asian Games tanba fallansu hosi Komité Olimpíku Nasionál Timor-Leste (CONTL-sigla portugés).
“Ami labele tuir ona kompetisaun, tanba ami viajen hosi Timor-Leste to’o iha Xina, ema halo hotu ona Technical meeting, entaun Boxista Timor-Leste labele kompete, ami preparadu no prontu ona maibé viajen tarde ami labele kompete”, Bixista Delio Mouzinho dehan ba Agência TATOLI via media sosiál WhatsApp, sábadu ne’e.
Nia dehan, fallansu hirak ne’e hotu halo hosi CONTL tanba hatene hela oráriu maibé la preokupa hodi haruka atleta sira viajen sedu.
“Ami viajen tarde ne’e falla hosi CONTL, se ami mai sedu karik ami bele kompete duni, sente triste los tanba Estadu gasta ona osan mai ami atu mai hala’o jogu maibé ami mai la joga, maibé atu pasiar los de’it”, atleta afirma.
Nune’e mós, Konselleiru Klube Boxe El-Matador Juvinál Dias konsidera CONTL inkapasidade atu organiza atleta sira ba kompete iha jogu ne’e.
“Inkapasidade CONTL nian, tanba ita atu rejistu atleta ruma ba joga tenke hatene uluk kalendáriu jogu nian no Technical meeting bainhira, ida ne’e de’it sira labele hatene ne’e, sira inkapasiade duni, gosta utiliza de’it osan Estadu hodi ba pasiar, simu perdiem no seluk tan”, Juvinál dehan.
Hosi fallansu hirak ne’e, nia dehan, CNTL hatudu momos inkapasidade tanba halo tratamentu de’it mós sei problema, liuliu viajen tikete atleta nian de’it seidauk bele hodi rezulta la konsege Technical meeting.
“Ami sente triste tanba ami-nia jogadór estrela Delio atu ba kompete maibé la konsege, tanba iha jogu ne’e momentu ida atu ami-nia boxista bele aumenta nia karreira hakat faze ida ba olimpiade no seluk tan, maibé la konsege joga ne’e, ami triste no konsidera CONTL inkapasidade”, nia dehan.
Hanesan El-Matador, husu ba Komisaun liuliu CONTL atu halo klarifikassun ba públiku tanba antes jogadór sira ba kompete iha jogu ne’e uza osan Estadu nian.
“Sira tenke esplika tanba sa, mak sira haluha regra ne’ebé mak estabelese hosi komisaun internasionál no ikus mai mosu hanesan ne’e”, nia relata.
Tanba ne’e, El-Matador husu ba Governu liuliu Ministériu Juventude Desportu Arte no Kultura (MJDAK) atu halo auditoria sériu ba CONTL tanba laiha responsabilidade utiliza osan Estadu nian.
“MJDAK tenke sériu halo auditoria ida ba Komité Olímpiku, tanba utiliza osan Estadu nian ba saugati de’it, la halo buat ida”, nia hatete.
Ho asuntu ne’e, Agência TATOLI tenta konfirma ba Vise Prezidente no Sekretériu Jerál CONTL via media sosiál WhatsApp maibé ladauk fó resposta.
Tuir oráriu ne’ebé Komisaun Asian Games fó sai, Timor-Leste nia naran la tama iha lista tanba la konsege tuir Technical meeting.
Ba eventu ne’e, Governu Timor-Leste gasta osan hamutuk rihun $400 hodi fasilita modalidade hamutuk 10 no kontijente sira ne’ebé ba partisipa iha eventu ne’e.
Iha jogu ne’e, Timor-Leste nia delegasaun hamutuk ema na’in-56, hosi númeru ne’e atleta na’in- 26, restu seluk ekipa delegasaun.
Ekipa Timor-Leste aranka ba Xina iha 21 setembru no to’o iha Xina, iha 23 setembru tuku 12 kalan oras Xina nian.
Technical meeting hala’o iha 22 setembru, hahú iha tuku 10:00 to’o tuku 12:00 kalan oras Xina nian, maibé ekipa Timor-Leste liuliu modalidade Boxe labele partisipa tanba to’o tarde. Tuir oráriu ne’ebé iha, jogu hahú 23 setembru no remata 08 outubru tinan ne’e.
Atleta Nasionál ne’ebé mak atu kompete iha Asian Games mak Délio A mouzinho, Edegar Foe Quintas, Eligio Raimundo Gayo no Alexandre Milano no ekipa ofisiál sira ne’ebé akompaña maka Januario da Silva Brito (Prezidente FBATL), Rogerio Amaral Soares (Sekretáriu Jerál FBATL) no Sebastião da Silva (Treinadór Nasionál).
Jornalista: Hortencio Sanchez
Editór : Zezito Silva
