DILI 10 outubru 2023 (TATOLI) – Komandu Polísia Nasionál Timor-Leste (PNTL) Munisípiu Dili, liuhosi servisu informasaun Makikit, halo vijilánsia no detein ona suspeitu ne’ebé halo tranzasaun ilegál iha Taibeisi.
Sigarru hirak ne’e bainhira hatama, Makikit halo akompañamentu hosi Fronteira to’o Dili no ikus liu mak detein iha merkadu Taibesi tanba atu halo tranzasaun illegál. Suspeitu ne’e joven mane ida ho naran inisiál QN, tinan 27 hosi Postu-Administrativu Hauba, Munisípiu Bobonaru.
“Sigaru hirak ne’e hatama ilegál hosi área fronteira Indonézia mai Timór-Leste hodi fa’an tutan iha merkadu Taibese, ida-ne’e mak servisu informasaun kaptura iha Dili laran”, hatete liuhosi komunikadu ne’ebé Agência TATOLI asesu hosi media Ministériu Interiór (MI), tersa kalan.
Evidénsia ne’ebé Polísia preende maka sigaru ho marka Surya 12 hamutuk pakote 159 no sigarru marka Thanoes pakote 402, totál hamutuk 561 pakote.
Hafoin asegura suspeitu ne’e, Makikit kontatu kedas ba Eskuadra PNTL Nain-Feto, hodi lori suspeitu ba Komandu Munisípiu Dili atu halo detensaun no kontinua prosesa ba Ministériu Públiku tanba PNTL nia dever maka kaptura no halo identifikasaun enkuantu ba kazu krime, sei prosesa ba tribunál.
Suspeitu daudaun ne’e iha hela sela detensaun Caicoli, Komandu PNTL Munisípiu Dili ho oras 72.
Jornalista: Hortencio Sanchez
Editór : Zezito Silva
