BOBONARO, 13 outubru 2023 (TATOLI)-Ohin tuku 10:00 ne’e Meza asembleia suku simu dokumentu kandidatura ne’ebé atu partisipa iha eleisaun lideransa komunitária ne’ebé tuir kalendáriu sei realiza iha loron 28 fulan ne’e.
Iha prosesu ne’ebé remata iha tolu 13:00 meiu-dia ne’e meza asembleia suku Holsa, Postu Administrativu Maliana, Munisípiu Bobonaro simu kandidatura ema na’in haat mak submete dokumentu.
Kandidatura na’in haat ne’e mane hotu ida António Santa Cruz re-kandidatura, Victor Martins, Laurindo Pires Santos no Salomão Paulino.
Atividade ne’e observa direita hosi Prezidente Autoridade Munisípiu Bobonaro, Ernesto de Oliveira Barreto, Administradór Postu Administrativu Maliana,Tomas Laco-Loe no superviziona hosi Ofisiál Supervizaun Eleitorál hosi Komisaun Nasionál Eleisoens (CNE Sigla Portugés) no hetan seguransa hosi membru Komandu Polísia Munisipiu Bobonaro.
Iha entrevista Kandidatu,Victor Martins, manifesta katak nia hakarak kandidata-an, hodi kontribui esperiénsia no kapasidade naton ne’ebé iha atu dezenvolve suku Holsa.
“Karik ha’u eleitu sai xefe suku,ha’u sei haree liu bá povu nia nesesidade moris liu-liu ba dezenbolvimentu suku Holsa,” nia garante ba Jornalista sira,iha sede suku Holsa, sesta ne’e
Nia optimista sei hetan lejitimu hosi povu atu ukun suku Holsa durante tinan hitu.
“Ha’u hanesan sidadaun Timoroan, eleitu mós ha’u simu obrigadu barak ba povu Hola, karik la eleitu mós ha’u simu ho ha’u-nia liman nakloke no ha’u sei koopera ho xefe suku ne’ebé eleitu,” Kandidadatu ne’e promete
Nune’e mós, Kandidatu António Santa Cruz, rekorda katak nia lidera suku ne’e durante tinan 19 ona no ohin deside rekandidatu tanba hadomi liu povu no rai Holsa.
“Ha’u sei la hosik povu ida ne’e sai abandona iha situasaun ne’ebé sira presiza,tanba ne’e mak ha’u hakarak re-kandidata ho prinsípiu ida katak ha’u hakarak dezenvolve suku ida ne’e no servisu hamutuk ho povu sira atu lori suku ida ne’e la’o ba oin,” Santa Cruz deklara.
Kandidatu ne’e hatutan, mehi ne’e nia iha ba periodu 2023-2027 mak oinsá buka meiu para governu fó apoia masimu liután hodi responde ba problema komunidade sira enfrenta.
“Ami atu haree ba ema vuneravél liu-liu faluk no oan-ki’ak sira ne’ebé laiha kbiit atu bele dezenvolve rasik sira nia-an no sira hela fatin, entaun liu hosi programa Dezembolvimentu Suku ami hakarak haree no tau-matan liu ba povu nia moris,” nia dehan.
Santa Cruz hakle’an karik povu Holsa la depozita komfiansa ba nia iha eleisaun 28 outubru agora, hanesan ema Holsa-oan nia prontu apoia ideia no koopera ho xefe suku eleitu hodi hadiak suku ne’e.
Atuál xefe suku ne’e esklarese durante mandatu périodu tolu ona nia konsege halo buat lubuk ida liu-liu apoia Programa Governu ne’ebé implementa hosi Programa Nasionál Dezembolvimentu Suku (PND) hodi halo reabilitasaun estrada, Konstrui Uma Naroman ba Povu (UNP) no reablitasaun sede suku.
Alene ne’e programa sira ne’ebé trasa ona atu implementa iha tempu badak mak projetu Perfuraasaun Bee-moos ba komunidade aldeia Oplegul.
Tuir dadus, suku Holsa iha populasaun nain 4,000 resin mak hosi aldeia Taz, Oplegul, Loloa, Bilicou, Solugolo no Secar.
Notísia relevante:SEI enkoraja feto Bobonaro kompete iha eleisaun suku
Jornalista: Sergio da Cruz
Editór: Evaristo Soares Martins
