VIKEKE, 10 Maiu VIKEKE (TATOLI)—Koordenadór Sentru Agro-Komérsiu Raitahu, Munisípiu Vikeke, Agusto Pinto Soares, informa Sentru Agró-Komérsiu prepara ikan Nila hamutuk 5.000 atu faan ba komsumidór sira iha Munisípiu Vikeke.
Notísia Relevante: Sentru Agro-Komérsiu Raitahu Vikeke enfrenta difikuldade ba kombustivel
“Kona-ba atividade sira-ne’ebé daudauk ne’e sentru la’o fila-fali iha sentru ida mak peska ne’e hanesan atividade adisionál husi produsaun karau susu-been. Tan ne’e, ba atividade peska ne’e ita iha kolan modelu beton ne’e hamutuk 13. Maibé, ami hatama ona ikan Nila oan ba kolan hamutuk 12. Nune’e ita haree ikan oan sira komesa boot daudauk ona, ami planu ne’e fulan tolu (3) kolleta hodi faan ba ita-nia konsumidór sira-ne’ebé presiza,” Agusto Soares Pinto hateten ba Agência Tatol, iha sentru Agró-Komérsiu Raitahu, ohin.
Nia relata, kona-ba ikan ne’ebé hatama ba kolan sira-ne’e tipu ikan Nila metan no Nila mean khaur malu no kada kolan ida hatama ikan totál hamutuk 250, durasaun kolleta kada fulan tolu.
“Ikan-oan ne’e ami foti husi Ministériu Agrikultura Peska, Pekuária no Floresta (MAPPF) ne’ebé prepara Sentru viveiru ikan iha Suku Loihunu, Postu Administrativu Ossu, Munisipiu Vikeke. Aleinde ne’e, ba oin, ami sei koordena ho MAPPF nasionál para ita kolleta ikan. Karik, osan balun ita hatama ba kofre Estadu no balun ita jere ba sentru hodi garante ba sustentablidade atividade sentru ida-ne’e. Tan ne’e, ami sei konsulta uluk lai ba parte nasionál tanba ita hakarak ne’e buat hotu transparánsia,” nia dehan.
Nia haktuir, planu ba oin sei kria mós kolan rai hodi preparta fatin ba viveiru ikan oan, atu nune’e labele foti tán ikan oan husi fatin seluk maibé prodús rasik ikan oan iha kolan referida.
“Kolam hirak-ne’e uluk asosiasaun sira mak halo, maibé asosiasaun sira la’o tiha. Tan ne’e, mak Governu rasik mak jere fila-fali hodi koloka ami iha sentru ida-ne’e hodi tau matan ba atividade pekuária. Ami sei tau matan ba área peska atu ba oin la nafatin ho di’ak,” nia hateten.
Entretantu, funsionáriu ne’ebé MAPPF koloka iha sentru Agro-komérsiu Raitahu total hamutuk na’in-16 ne’ebé kompostu husi mane na’in-13 no feto na’in-tolu (3) ne’ebé daudaun ne’e ativu iha snetru hodi tau matan ba atividade pekuária no peska.
Notísia Relevante: Sentru Integradu Agro-Komérsiu Indústria Raitahu implemeta atividade pekuária no ortikultura
Jornalista : Vitorono Lopes da Costa
Editór : Cancio Ximenes
