OÉ-CUSSE, 20 outubru 2023 (TATOLI – Sekretáriu Estadu Protesaun Sivíl (SEPS), Domingos Mariano Reis, husu ba Autoridade Rejiaun Autónoma Espesiál Oé-cusse, Ambeno (RAEOA) atu apoia rai ba futuru konstrui edifísiu Protesaun Sivíl iha Oé-Cusse Ambeno.
Notísia relevante: Protesaun Sivíl sei rekupera uma 26 iha Oé-Cusse
Domingos Marianu Reis, propoin pedidu ne’e bainhira iha enkontru ofisiál ho Prezidente Autoridade RAEOA, Arsénio Paixão Bano, iha edifisiu ZEESM Oé-Cusse, sesta ne’e.
“Objetivu ohin ami Oé-Cusse iha objetivu tolu, primeiru hasoru Prezidente Autoridade RAEOA, atu husu apoia hodi oferese netik fatin ka rai para bele harii edifisíu ba Autoridade Protesaun Sivíl, razaun SEPS husu apoia, atu halo sentru evakuasaun ho sentru treinamentu ba unidade espesiál sira iha Oé-Cusse,” Governante ne’e ba jornalista sira hafoin remata enkontru.
Objetivu daruak, atu observa direita kondisaun Autoridade Protesaun Sivíl iha Oé-Cusse, objetivu datolu atu halo asauan karidade relasaun ho loron mundiál ba dezastre, ne’ebé sei komemora iha loron 25 outubru 2023 ne’e sei selebra iha Kribas, Manatuto.
Governante ne’e, informa, kona-bá edifisíu Autoridade Protesaun Sivíl Oé-Cusse, Governante observa no halo levantamentu dadus, prioridade liu maka kondisaun edifisíu, mobiliáriu; meza no kadeira, transporte inklui rekursu umanu.
“Dadus ohin iha foti ona, ita tau ona iha planu OJE 2024, sei halo deskusaun iha Konsellu Ministru para lori ba haree atu hetan apresiasaun hosi Parlamentu Nasionál (PN),” nia promete.
Notísia relevante: Governu apoia materiál konstrusaun ba vítima dezastre naturál 26 iha Oé-Cusse
Prezidente Autoridade RAEOA, Arsénio Paixão Bano, agradese tanba Autoridade Protesaun Sivíl nasionál observa direita kondisaun iha Oé-Cusse, no promete atu responde pedidu ba asuntu rai nian iha Oé-Cusse.
“Ohin ha’u informa, katak sira-nia intervensaun sempre lais ba dezastre emejénsia sira atu fó apoia, tan ne’e maka RAEOA hakarak apoia sufisiente ba protesaun sivíl tanba ita hotu la ses hosi dezastre, rekomendasaun no pedidu ne’ebé ohin hato’o mai Autoridade kona-bá rai, ita sei buka no sei haree tanba ne’e servisu importante tanba Autoridade ne’e maka koordena instituisaun hirak-kedan inklui sosiedade sivíl no mós hosi Krus Vermella ho seluk-tán,” nia garante.
Notísia relevante: Protesaun Sivíl Oé-Cusse ho parseiru dezenvolvimentu avalia progresu serbisu no prepara planu ba 2024
Jornalista: Abílio Elo Nini
Editór: Rafael Ximenes de A. Belo
