OÉ-CUSSE 09 outubru 2023 (TATOLI — Governu liuhosi Sekretaria Estadu Protesaun Sivíl (SEPS) hamutuk ho Autoridade iha Rejiaun Administrativa Espesiál Oé-Cusse Ambeno (RAEOA), segunda ne’e apoia materiál konstrusaun ba vítima dezastre naturál hamutuk uma-kain 26 iha Oé-Cusse Ambeno.
Komandante Autoridade Protesaun Sivíl (APC, sigla portugés) RAEOA, inspetór Xefe Polísia, Herman Metan, informa, distribuisaun materiál konstrusaun hirak-ne’e ho kategoria tolu hanesan, uma aat totál, aat kmaan no aat natoon.
“Materiál konstrusaun ohin mai to’o RAEOA, atu fó rekuperasaun ba uma-kain 26, ne’ebé maka sira hetan dezastre naturál iha 2022 no balu iha 2021, ne’ebé ohin ita hotu iha-ne’e, ho autoridade materiál to’o iha ne’e para distribui ba benefisiáriu sira,” Herman Metan, ko’alia iha Oé-Cusse.
Notísia relevante: Protesaun Sivíl sei rekupera uma 26 iha Oé-Cusse
Nia informa, materia hirak-ne’e maioria konstrusaun sivíl, komposta hosi simentu, besi-beton, kalen, baja ringan, besi-kotak, martelu, balde, metru ho tán osan mão de obra.
Nune’e vítima sira bele konstrui uma ida, tanba uluk hetan estragu hosi dezastre naturál, atu sira bele hela fali iha uma ida ho di’ak no dignu ne’ebé fornese hosi APC.
“Ohin distribui ona, APC sei monitoriza hotu-hotu, konstrui uma ne’e, hosi inísiu to’o finaliza, nune’e labele uza materiál sira-ne’e atu fahe ka fa’an fali maibé osan ne’e ohin simu ho sasán sira-ne’e atu konstrui uma ho dignu,” nia afirma.
Vitíma Atanasio Caunan, hosi suku Usitasa’e, sub-rejiaun Oésilo, agradese ba Governu tanba bele oferese apoia nune’e bele harii fali uma ho kondisaun dignu.
“Ha’u sente kontenti tanba Governu ho Estadu tau matan ba ami liuhosi materiál sira-ne’e fó ba ami, ha’u hetan dezastre kmaan hanesan anin hú uma maka hetan estragu,” nia orgullu.
Vítima José Corbafu, hosi suku Lalisuk, sub-rejiaun Pante Makasar, sente kontente hafoin enfrenta dezastre naturá; dezde 2022 no 2023.
“Ne’e ha’u hetan dezastre mota sa’e, afeta ba ha’u-nia sasán iha uma hela-fatin, hanesan televizaun no sasán kioske bee-mota sa’e estragu totál, maibé ohin Governu oferese ona apoia,” nia katak.
Notísia relevante: Protesaun Sivíl Oé-Cusse ho parseiru dezenvolvimentu avalia progresu serbisu no prepara planu ba 2024
Entretantu, benefisiáriu ne’ebé hetan apoia materiál konstrusaun sira hamutuk uma-kain 26 ho kategória tolu, hanesan aat totál uma-kain 19 ho kustu materiál konstrusaun $19,000.00, aat natoon uma-kain haat, ho kustu materiál $3,000.00, no aat kmaan uma-kain tolu ho kustu materiál $1,800.00.
Nune’e mós kona-bá osan ba mão de obra, ba kategória aat totál kada uma-kain simu $1000,000.00, aat natoon simu $750,000.00 no aat kmaan simu $600,000.00.
Jornalista: Abílio Elo Nini
Editór: Evaristo Soares Martins
