DILI, 23 outubru 2023 (TATOLI) – Timor-Leste Police Development Programme (TLPDP) hosi Austrália disponibiliza Robot esplozaun ba Unidade Espesiál Polísia (UEP).
Robot ne’e iha kapasidade bele deteta materiál esplozaun, bele muda materia esplozaun hosi fatin ida risku ba fatin seluk inklui bele halo dezativa ba materiál esplozaun no bele halo rahun bomba ne’ebé ema tau iha fatin risku sira.
Ministru Interiór (MI) Francisco da Costa Guterres, hateten Robot ne’ebé apoia hosi TLPD ba PNTL liuhosi Departamentu EOD Unidade Espesiál Polísia ne’e hanesan apoiu dahuluk ne’ebé Governu Austrália liuhosi TLPDP fó PNTL nudar parte ida hosi modernizasaun instituisaun PNTL.
“Robot ne’e iha nia funsaun bele deteta foti sai bomba ne’e tau sess tiha no Robot ne’e bele halo dezativa ba materiál esplozaun bomba”, ministru iha nia intervesaun iha serimónia entrega ekipamentu Robot iha UEP Bairro Pite, segunda ne’e.
“Ita agradese ba apoiu TLPDP nian tanba foin primeira véz no sira komprometidu sei apoia nafatin ita kona-ba ekipamentu balun tán, ida-ne’e ita agradese tebes tanba sira bele ajuda ita-nian polísia hodi dezenvolve di’ak liután PNTL iha futuru”, nia adianta.
Nia dehan, Governu sei investe liután PNTL liuliu ekipamentu sira atu moderniza liután servisu PNTL iha futuru.
“Ita sei kontinua atu kria kooperasaun ho nasaun sira seluk atu dezenvolve PNTL ho di’ak liután. Ita mós presiza investe liután ita-nia instituisaun PNTL atu polísia bele profisionál liután bainhira halo sira-nia servisu”, nia informa.
Nia hatutan, atu hasoru amaesa sira ba oin no preparasaun Timor-Leste nian adezaun ba membru ASEAN inklui Governu nian planu atu dada kadoras Greater Sunrise mai TL, presiza investe ba PNTL hodi halo sira-nia servisu ho di’ak hodi hasoru eventu sira hanesan ne’e.
“Ita tenke prepara ita-nia polísia atu responde ba kualker krime ne’ebé mak mosu, kuanndu mosu situasaun komplesu sira hanesan ne’e ita-nia polísia prontu atu hasoru’’, nia afirma.
Francisco Guterres, dehan Departamentu EOD Unidade Espesiál Polísia agora daudaun iha ema na’in-ualu maibé iha na’in-neen mak preparadu atu halo operasionalizasaun ba robot ne’ebé mak TLPDP apoiu.
Governante ne’e dehan, membru EOD na’in-neen ne’e sei tuir formsaun durante semana ida ne’ebé fó hosi TLPDP.
“Ha’u husu ba membru polísia EOD UEP na’in-neen tenke aproveita formsaun ne’e ho di’ak para bele halo operasaun ba robot ne’ebé ohin TLPDP apoiu ba ita, atu nune’e ba oin bele ajuda EOD halo servisu kona-ba detetivu, materiál esplozaun no harahun materiál esplozaun bomba ho di’ak”, nia adianta.
Iha fatin, Komandante Jerál PNTL, Komisáriu Jerál Herique da Costa, agradese ba apoiu Governu Austrália nian liuhosi TLPD ne’ebé apoiu ona robot ba EOD.
“Ami agradese tebes ba apoiu robot ne’ebé TLPD fó ba PNTL. PNTL nian susesu nafatin konta mós ho ita bo’ot sira nian apoiu”, nia revela.
Iha fatin hanesan, Enkarregada Negósiu Embaixada Autrália, Caitlen Willsar, Robot ne’ebé TLPDP apoia ne’e bele deteta materiál esplozaun, bele muda matéria esplozaun hosi fatin ida risku ba fatin seluk inklui bele halo dezativa ba materiál esplozaun no bele halo rahun bomba ne’ebé ema tau iha fatin risku sira.
“Austrália kontinua komprometidu atu kontinua fortifika kooperasaun ho PNTL atu dezenvolve PNTL iha futuru”, nia konklui.
Jornalista: Natalino Costa
Editór : Zezito Silva
