DILI, 08 novembru 2023 (TATOLI) – Kompañia Liberta Unip Lda,finaliza ona konstrusaun uma ba negosiante hamutuk 22 iha merkadu Taibessi-munisípiu Dili.
Osan ba konstrusaun fatin negósiu ne’e hamutuk $109,500.50. Konstrusaun uma ba negosiante ne’e atu fasilita vendedor sira ne’ebe iha tinan kotuk ai-han nia uma motuk hodi kontinua halo negosiu.
Notísia relevante: PNTL kontinua buka tuir motivu inséndiu iha merkadu Taibesi
Kazu insendiu ne’e akontese iha loron 24 dezembru 2022, tuku 11:00, kalan hodi rezulta uma hamutuk 54 mak ahi- han mutuk.
Hafoin finaliza konstrusaun,Diretora kompaniã Josefina da Conceicão Silva entrega ofisiál ba Prezidente Autoridade Munisípiu Diíli, Guilhermina Filomena Saldanha Ribeiro atu halo jestaun.
Diretora Jerál Toponímia,hosi Sekretária Estadu Asuntu Toponímia no Organizasaun Urbana Maria Odete Barros Florindo no Autoridade Munisípiu Dili entrega ofisiál fatin negósiu ne’e ba negosiante ne’ebé uluk hetan inséndiu iha merkadu Taibessi.
“Fatin faan sasan ne’e hodi benefisia ka fasilita negosiante hamutuk rua-nulu resin rua. Termu entrega ne’e simu husi Presidente Autoridade Munisípiu Dili, hodi utiliza fatin ba negósiu nian”, refere nota ne’ebé Agência TATOLI hosi pájina ofisial Ministériu Administrasaun Estatal (MAE), kuarta ne’e.
Negosiante na’in-22 ne’ebé asesu ba fatin negósiu ne’e liuhosi dada rifa tuir númeru ne’ebé negosiante sira rasik mak hili.
Iha termu entrega marka prezensa hosi reprezentante komandu PNTL Munisípiu Díli, autoridade lokál no negosiante sira.
Notísia relevante: Jestaun Merkadu identifika ona baraka privada 361 iha merkadu Taibesi
Jornalista : Jesuína Xavier
Editór : Florencio Miranda Ximenes
