DILI, 09 novembru 2023 (TATOLI)—Vise Ministru ba asuntu Parlamentár, Adérito Hugo da Costa, hateten IX Governu Konstituisionál sei submete proposta Orsamentu Jerál Estadu (OJE) 2024 ba Parlamentu Nasionál (PN) iha 24 novembru 2023.
Notísia Relevante: Governu hahú ohin sesaun KRO ba OJE 2024
“Kalendáriu ne’ebé ami aprezenta 24 novembru, tanba lei orsamentu retifikativu 2023 nian ita halo mudansa diskusaun ba orsamentu. IX Governu nia mandatu iha 01 jullu, ida-ne’e dentru fulan lima tenke submete proposta OJE 2024 nian. Entaun, ami adianta sedu hodi fó tempu ba Parlamentu Nasionál bele halo audiénsia públika depois diskusaun jeneralidade, espesialidade to’o aprovasaun final globál,” Vise Ministru ne’e hateten ba jornalista sira iha uma fukum PN, kinta ne’e.
Mezmu, antes ne’e data tentativa 15 novembru mak submete ba PN maibé haree ba elaborasaun, to’o ohin komite revizaun orsamentu sei hala’o hela tanba ajusta regra ka rejime mudansa balun ne’ebé IX Governu presiza halo.
Tanba ne’e, tama iha pakote prioridade loron 120 aruma fali hotu regra ka lei sira-ne’ebé antes introdús hosi Governu anteriór ba sistema sira, hodi tuir fali modelu IX Governu nia haree fleksivel no efisíénsia liu polítika orsamentu nian.
“Entaun, senáriu ida atu aprezenta iha 15 novembru la konsege, nune’e fiksa ba 24 novembru. Tuir lei ezistente OJE 2023 nian no lei enkuadramentu orsamentál ne’ebé halo alterasaun fó ba Governu foun ne’e, atu aprezenta orsamentu tuir mai ne’e durante fulan lima. Entaun, sura hosi 01 jullu ne’e sedu liu,” nia hateten.
Haaree ba tempu debate sufisiente no PN bele haree sirkunstánsia bele submisaun iha 24 novembru, sira bele halo audiénsia públika no bele fiksa kalendáriu debate jeneralidade no espesialidade, no hein katak antes feriadu Natál ne’e bele halo aprovasaun finál globál.
Mezmu nune’e, Governante ne’e seidauk fó sai kona-ba pedidu Governu ba PN atu debate proposta OJE 2024 ho karáter urjénsia, tanba prosesu elaborasaun la’o hela no seidauk iha aprovasaun iha Konsellu Ministru.
“Seidauk haree, tanba to’o ona ita foin haree. Agora iha faze elaborasaun proposta-lei OJE 2024 nian. Iha Konsellu Ministru mós seidauk aprova, tanba aguarda hela sekuénsia kalendáriu ne’ebé iha. Elaborasaun hosi komite revizaun orsamentu mós la’o daudaun hela,” nia hateten.
Jornalista : Nelson de Sousa
Editór : Cancio Ximenes
