DILI, 14 novembru 2023 (TATOLI)–Governu liuhosi Sekretária Estadu Igualdade (SE) rejista hosi feto poténsiál 241 (11%) ne’ebé kandidata-aan ba xefe suku ne’ebé kompete iha eleisaun órgaun suku 2023 ne’e, iha feto potensiál 18 mak eleita sai xefe suku.
Notísia Relevante: Ohin, Timor-Leste realiza eleisaun suku segunda ronda
“Lideransa feto hamutuk na’in-18 mak eleita sai xefe suku (4%). Munisípiu Aileu iha xefe suku feto eleita hamutuk na’in-haat (4), Ainaro na’in-ida (1), Baucau na’in-haat (4) , Bobonaro na’in-ida (1) , Covalima na’in-ida (1) , Díli na’in-tolu (3) , Ermera na’in-ida (1), Manatuto na’in-rua (2) no Manufahi na’in-ida (1),” Sekretária Estadu Igualdade (SE), Elvina Sousa Carvalho, hateten liuhosi nota ne’ebé Agência Tatoli asesu, tersa ne’e.
Hosi totál suku 442 ne’e, iha suku 271 mak avansa ba eleisaun suku segunda ronda, nune’e kompara ho xefe suku feto períodu liubá, períodu ida-ne’e númeru xefe-suku feto ne’ebé eleitu tun ho 1% tanba iha períodu 2016-2023 ne’e xefe suku feto iha na’in 21 (5 %).
Tuir dadus ne’ebé SEI asesu hosi CNE katak, hosi totál suku 452 iha territoriu Timor laran, iha suku 442 mak tinan ida-ne’e hili nia xefe suku foun liuhosi eleisaun suku 2023, no suku 10 seluk labele tuir eleisaun suku iha tinan ida-ne’e tanba suku hirak ne’e konsidera hanesan suku foun, no tuir planu suku 10 ne’e sei tuir eleisaun órgaun suku iha abríl 2024.
Hosi totál suku 442, kandidatu/a ka lideransa lokál hamutuk ema na’in-2.105 mak rejista, kompostu hosi feto na’in-241 (11%) no mane hamutuk 1,864 (89%) mak kompete iha eleisaun suku 2023.
Ho rezultadu ida-ne’e, nia hateten, esperiénsia ne’ebé lideransa feto sira hetan iha eleisaun xefe suku períodu ida-ne’e nafatin sai lisaun no preferénsia ba lideransa feto ho potensialidade sira atu haka’as aan nafatin, labele dezanima no iha prontidaun nafatin atu kompete no okupa iha kualkér pozisaun foti desizaun nian.
“Nune’e ha’u hakarak fó parabéns ba xefe-xuku eleitu sira liuliu ba xefe suku feto. Povu hein ita-boot sira-nia servisu makaas hodi dezenvolve ida-idak nia suku tuir kompromisu ne’ebé hato’o ona liuhosi programa ida-idak nia programa,” nia dehan.
Jornalista : Osória Marques
Editór : Cancio Ximenes
