VIQUEQUE, 14 novembru 2023 (TATOLI)—Autoridade Protesaun Sivíl (APC) munisípiu Viqueque, tersa ne’e, distribui pakote emerjénsia ba vítima inséndiu, Ângelo Laranjinha Pinto, iha aldeia Uelaco, suku Bahalara-Uain, postu Viqueque Vila, munisípiu Viqueque.
Ajuntu APC Viqueque, Cirilio Soares Gomes, hateten, ekipa halo ona verifikasaun ba uma ne’ebé hetan sunu, ne’ebé momentu ne’ebá vítima la konsege salva sasán uma-laran.
“Akontesimentu dezastre iha segunda (13/11) maizumenus tuku 17:00 lorokraik, hosi parte ami-nia konsidera dezastre nune’e ami-nia ekipa bá fatin akontesimentu hodi rekolla dadus no distribui pakote emerjénsia ba vítima Ângelo, ne’ebé maka ahi-han nia uma,” Cirilio Soares Gomes, informa ba Agência Tatoli, iha suku Bahalara-Uain, tersa ne’e.
Notísia relevante : Ema deskoñesidu sunu kandidatu xefe suku Bahalara Uain Viqueque nia uma
Pakote emerjénsia pakote ida kompostu hosi foos, masi-midar, kafé, supermi, sardiña, mina no inklui sasán kuziña.
“Ami-nia ekipa hamutuk ho ekipa investigasaun hosi Polísia Nasionál Timor-Leste (PNTL) Viqueque halo identifikasaun motivu akontesimentu. Depois ekipa halo investigasaun maka foin fó sai ba públiku, liu-liu motivu akontesimentu. Hosi ami maka distribui pakote emerjénsia ba vítima inséndiu,” nia hato’o.
Iha fatin ketak, Vítima inséndiu, Ângelo Laranjinha Pinto, haktuir, ahi-han uma ne’e iha bainhira nia ba partisipa iha eleisaun segunda volta, hafoin votasaun ramata, tama kontejen votu lorokraik maka rona dehan ahi-han uma.
“Akontese horiseik, dadeersan bainhira ha’u prepara-an ba tuir votasaun, depois votasaun hotu tuku 15:00 tama ona prosesu kontejen votu, ema fó hatene ha’u dehan uma hetan sunu. Depois ha’u foti motorizada halai bá haree ai-han hotu no Polísia sira mós ba haree hotu no halo kedas investigasaun ba ha’u. Lori ha’u ba Eskuadra Viqueque Vila hodi hasai deklarasaun ba akontesimentu, ha’u la deskonfia ema ruma,” Vítima inséndiu konta tuir.
Xefe suku eleitu ne’e husu abitante Bahalar-Uain atu hakmatek iha fatin tanba kestaun ne’e entrega ona autoridade seguransa.
“Ha’u husu ba abitante suku Bahalara-Uain ida-idak atu hakmatek iha fatin no labele pániku tanba akontesimente ne’e ha’u entrega ona ba parte PNTL maka hala’o knaar,” nia tenik.
Jornalista : Vitorino Lopes da Costa
Editora : Julia Chatarina
