VIQUEQUE, 13 novembru 2023 (TATOLI)—Ema deskoñesidu sunu kandidatu xefe suku Bahalara, postu Viqueque Vila, munisípiu Viqueque nia uma, segunda ne’e, iha meiu dia, hodi rezulta sasán iha uma-laran la konsege salva tanba ahi han hotu.
“Ahi han uma ne’e iha tempu ema bá hotu tuir votasaun, ne’ebé la haree ema ruma. Maibé, ha’u la deskonfia ba sirkuitu eletrisidade ruma, tanba uma ne’e didin ho kalen. Kandidatu Ângelo mesak mak hela iha laran,” Xefe aldeia Uelaco, suku Bahalara Uain, Abílio Pinto, informa ba Agência Tatoli via telefónika, segunda ne’e.
Líder komunitáriu ne’e haktuir, iha momentu akontese ahi han uma, uma-na’in bá tuir votasaun no nia rasik konta katak taka ona ahi eletrisidade mak foin hakat bá sentru votasaun.
“Ha’u sente difísil atu ahi han uma ne’e, ha’u deskonfia ema fakar gazolina maka sunu. Tanba ne’e maka rezulta sasán sira ne’ebé rai iha uma laran ahi han hotu,” nia konta tuir.
Notísia relevante : PNTL Viqueque halo identifikasaun ba ahi-han uma iha suku Uma-Uain Leten
Abílio Pinto, dehan mós katak, nia parte deskonfia ema sunu vítima nia uma tanba kandidatu xefe suku ne’e hakat ba eleisaun órgaun suku segunda volta, tanba durante ne’e nia laiha problema partikulár ho ema ruma.
“Ohin eleisaun hotu tama ba kontajen no hatudu rezultadu kandidatu Ângelo manán maioria,. Bainhira nia haruka ninia subriñu sira ba nia uma hodi foti karegadór atu karega telemóvel, to’o iha uma hetan ahi han ona uma. Nune’e, labarik sira tauk no halai fila,” Abílio Pinto, tenik.
Membru Polísia Nasionál Timor-Leste (PNTL) Eskuadra postu Viqueque Vila to’o kedas fatin akontesimentu maibé seidauk konsege deskobre ema ruma.
“PNTL kontinua halo prosesu identifikasaun ba motivu ahi uma,” nia realsa.
Iha sorin seluk, Xefe aldeia ne’e relata katak situasaun atuál iha suku Bahalarai Uain daudaun ne’e hakmatek, enkuantu membru Polísia sira kontinua halo seguransa iha suku laran.
Iha fatin ketak, Administradós postu Viqueque Vila, Duarte Branão Soares, fó fiar tomak ba autoridade seguransa hodi halo prosesu identifikasaun.
“Ita indika ba eleisaun ne’e, maibé seidauk identifika, depois PNTL halo identifikasaun hotu maka ita foin hatene loos motivu hosi ahi han uma. Enkuantu eleisaun ne’ebé ohin la’o iha suku Bahalara Uain, ita la haree ema ruma sadik malu no situassun la’o hakmatek,” nia hato’o.
Jornalista : Vitorino Lopes da Costa
Editora : Julia Chatarina
