BAUCAU, 20 novembru 2023 (TATOLI) – Autoridade Administrasaun Munisipál Baucau (AMB) konsidera xefe suku foun sai parseiru importante ba dezenvolvimentu durante tinan-hitu mai.
Sekretáriu Administrasaun Munisipál Baucau, Simão dos Santos Marques Pinhero, esplika, liuhosi eventu eleisaun komunitária komunidade hili ona xefe suku foun hamutuk na’in-59 ne’ebé kompleta to’o volta daruak iha loron-13 novembru liuba.
“Estrutura autoridade lokál ne’ebé iha baze mak xefe suku, sira mak matan, ibun no tilun nune’e sira sei sai parseiru importante ba prosesu dezenvolvimentu iha periodu tinan-hitu mai,” Sekretáriu Administrasaun Munisipál Baucau hateten iha Vila Nova, segunda ne’e.
Durante prosesu eleisaun komunitária to’o remata hala’o ho susesu hanesan situasaun hakmatek no laiha reklamasaun ruma nune’e sei hein kompleta tan membru konsellu suku hanesan eleisaun ba juventude feto no mane inklui lia-na’in iha loron-24 novembru semana-ne’e.
Hosi númeru xefe suku nain-59 refere, kandidatura feto na’in-haat mak eleitu ba lideransa komunitária komposta hosi postu Baguia iha suku Samalari ho naran Maria da Silva, postu Baucau Vila, suku Bucoli mak Teresinha dos Reis, postu Laga hosi suku Soba mak Francisca Soares no Gabriela Conceição eleitu iha suku Bualale hosi postu Quelicai.
“Sira sei simu pose iha loron selebarasaun independénsia 28 novembru hodi ofisialmente asume kargu xefe suku,” Simão Pinheiro akresenta.
Elisaun lideransa komunitária iha Baucau hamutuk total kandidatura xefe suku hamutuk 243, komposta hosi feto na’in-26 no mane na’in-217 ho total votante hamutuk rihun 99 resin.
Jornalista : Natalino Belo
Editór : Evaristo Soares Martins
