DILI, 22 novembru 2023 (TATOLI)–Sekretáriu Ezekutivu Comunidade dos Paises da Lingua Portuguesa (CPLP), Zacarias Albano da Costa, hateten Primeiru-Ministru (PM), Kay Rala Xanana Gusmão, husu atu relata relatóriu kompleta kona-ba fundu espesiál CPLP nian iha tinan oin.
Notísia Relevante: PPN-Zacarias Albano diskute haforsa implementasaun língua portugeza iha TL
“Ami ko’alia kona-ba Timor-Leste ba CPLP liuhosi fundu espesiál CPLP nian. Primeiru-Ministru husu ami para to’o tinan foun iha relatóriu kompleta kona-ba fundu espesiál, regulamentu ba aplikasaun orsamentu sira ba ita-nia Estadu membru CPLP na’in-sia,” Zacarias Albano da Costa hateten ba jornalista sira iha Palásiu Governu, kuarta ne’e.
Aleinde ne’e, diskute mós kona-ba projetu ne’ebé Timor-Leste bele apoiu la’ós hanesan solidariedade maibé hanesan prezensa Timor-Leste nian iha CPLP inklui reuniaun ho pontu fokal ba kooperasaun ne’ebé sei hala’o iha Timor-Leste tinan oin.
Tuir nia, ida-ne’e momentu importante ba Timor-Leste tanba simu reprezentante hosi diretór nasionál ba kooperasaun CPLP nian ne’ebé sei deside mós kona-ba projetu ne’ebé CPLP sei apoia, no iha projetu ida mós ne’ebé Timor-Leste mós sei aprezenta iha ne’ebá.
“Ida-ne’e mak ohin ko’alia iha enkontru ho Primeiru-Ministru, Kay Rala Xanana Gusmão, ami haree tema barak-barak naturalmente ajenda CPLP nian, depois Simeira CPLP, iha São Tomé e Príncipe ne’ebé nasaun ne’ebé Timor-Leste partisipa liuhosi Prezidente Parlamentu no mós Ministru Negósiu Estrajeiru. No, kestaun barak mak ami rua ko’alia kona-ba konsolidasaun língua portugeza,” nia dehan.
Notísia Relevante: MNEK ho Zacarias Albano diskute ajenda KM CPLP
Jornalista : Osória Marques
Editór : Cancio Ximenes
