DILI, 22 novembru 2023 (TATOLI) – Ministru Negósiu Estranjeiru no Kooperasaun (MNEK), Bendito dos Santos Freitas, hala’o enkontru kortejia ho Sekretáriu Ezekutivu Comunidade dos Paises da Lingua Portuguesa (CPLP), Zacarias Albano da Costa, hodi ko’alia kona-ba ajenda reuniaun Konsellu Ministru (KM) CPLP ne’ebé sei hala’o iha fulan jullu 2024 iha São Tomé e Príncipe.
“Ha’u mai tanba konvite ida hosi ministru, ne’e mak ha’u mai halo vizita ofisiál, ha’u hanoin importante tebes tanba Governu ne’e foun, mesmu ami na’in rua hasoru malu ona dala barak, sempre iha oportunidade atu update kona-ba ajenda CPLP nian ne’ebé mak sei hala’o tinan oin”, Sekretáriu Ezekutivu CPLP, Zacarias da Costa, dehan hafoin remata enkontru iha MNEK, Praia do Coqueiros, ohin.
Sekretáriu Ezekutivu CPLP mós informa ba Ministru MNEK, Bendito Freitas kona-ba posibilidade sei iha simeira extraordinária iha Lisboa Portugal hodi komemora tinan 50 akontesimentu ‘revolusão dos cravos” 25 abríl 1974, ne’ebé sei partisipa mós xefe estadu CPLP sira iha serimónia refere.
Aleinde ne’e, durante enkontru, Ministru MNEK, Bendito Freitas ho Sekretáriu Ezekutivu CPLP mós ko’alia kona-ba prosesu adezaun Timor-Leste nian ba ASEAN, tanba nasaun membru CPLP sira maioria fó sira-nia apoiu ba Timor-Leste atu adere ba organizasaun rerjionál ne’e.
Jornalista: Hortencio Sanchez
Editór : Zezito Silva
