DILI, 24 novembru 2023 (TATOLI) – Ministériu Edukasaun (ME) husu ba dirijente eskola no profesór sira iha territoriu atu organiza atividade iha kada eskola hodi komemora Loron Proklamasaun Independénsia ne’ebé monu iha 28 novembru.
Sekretáriu Estadu Edukasaun, Ensinu Sekundáriu no Eskola Téknika, Domingos Lemos, solisita ona ba eskola hotu hahú husi pré-eskolár to’o sekundáriu jerál no tékniku vokasionál atu tau konsiderasaun ba loron nasionál sira ne’ebé konsagra ona iha Konstituisaun Repúblika. Tuir governante, loron sira ne’e kada tinan Ezekutivu sempre selebra nune’e bele hametin timoroan nia nasionalizmu no patriotizmu.
Timor-Leste sei komemora loron proklamasaun 28 novembru, tanba ne’e eskola sira hotu tenke hatudu sira-nian responsabilidade atu organiza estudante sira hodi partisipa iha komemorasaun loron importante ba nasaun.
Nia dehan, ba atividade sira ne’e la presiza hein fali karta sirkulár husi ministériu, tanba komemorasaun ne’e hatuur ona iha kurríkulu edukasaun nian.
“Ha’u hanoin eskola iha responsabilidade tomak atu organiza atividade sira hodi komemora loron nasionál sira. Atividade loron nasaionál ne’e responsabilidade eskola ida-idak nian no hatuur ona iha kurríkulu edukasaun, tanba ne’e ha’u hakarak iha 28 novembru ne’e eskola ida-idak tenke iha atividade”, Domingos Lemos dehan iha eskola Canossa, ohin.
Governante ne’e dehan Ministériu Eduaksaun iha ona planu ba 2024 no sei hasai sirkulár ida ba eskola sira hotu iha territóriu atu hahú organiza ona estudante sira hodi partisipa iha loron nasionál sira.
“Despaxu ne’e ita sei husu ba eskola atu iha loron nasionál sira estudante labele férias iha uma, maibé suspende de’it maka sira-nian prosesu aprendizajen iha aula no atividade seluk relasiona ho loron nasionál tenke halo iha eskola. Tanba ne’e, eskola hamutuk ho profesór sira tenke iha kriatividade atu organiza eventu sira, nune’e alunu sira bele iha atividade hodi hametin sira-nian nasionalizmu no patriotizmu”, adianta.
Durante ne’e, atividade ba loron nasional sira iha Dili mak menus liu, maibé iha munisipiu sira sempre realiza mak kada eskola nia dirijente no profesór organiza sira-nian estudante sira hodi tuir atividade loron importante sira. “Entaun, husi sirkulár tinan oin atu hasai ne’e maka sei ezije eskola hotu bele tau ona atensaun ba loron importante sira ne’e”, reitera.
Jornalista: Tomé Amado
Editora: Maria Auxiliadora
