OÉ-CUSSE, 27 novembru 2023 (TATOLI) – Estadu Timor-Leste liuhosi dekretu Prezidente Repúblika númeru 104/2023, segunda ne’e atribui kondekorasaun medalla orden Nicolau Lobato no medalla orden funu na’in tinan 24 ho grau II no III ba kombatente na’in-182 iha Rejiaun Administrativa Espesiál Oé-Cusse Ambeno (RAEOA) nu’udar rekoñesimentu ba kontribuisaun luta libertasaun nasionál.
Seremónia kondekorasaun ne’e realiza iha otél Ambeno Oé-Cusse, hetan akompaña direita hosi Governu liuhosi Ministru Interiór, Francisco Guterres, reprezenta Primeiru Ministru no Sekretáriu Estadu Protesaun Sivíl.
Kombatente na’in-182 ne’e simu kondekorasaun ne’e, maioria 8a14, hamutuk ho martír na’in-sia (9), ne’ebé hetan ona validasaun hosi Ministériu Asuntu Kombatente Libertasaun Nasionál (MAKLN) no rejista ona iha faze dahuluk 2003 no 2005, ne’ebé hosi zona lima, zona Pante Makasar A hamutuk na’in 37, zona Pante Makasar B na’in-35, zona Oésilo na’in-37, zona Pássabe na’in-36 no zona Nítibe na’in-37.
Notísia relevante:Kombatente 182 iha Oé-Cusse sei simu medalla orden Nicolau Lobato
Iha biban ne’e, Ministru Interiór Francisco Guterres, reprezenta Governu Timor-Leste kongratula kombatente sira-nia dedikasaun iha tempu funu.
“Lori Governu no Estadu Timor-Leste nia naran, agradese no kongratula nai veteranu sira hotu, ba ita-boot sira-ne’ebé ohin simu kondekorasaun hosi Prezidente Repúblika,” Fransisco Guteres, ko’alia iha ámbitu serimónia kondekorasaun ne’e.
Guterres, hateten, kondekorasaun ne’e hatudu katak, Estadu ida-ne’e, nia hanoin no rekoñesimentu ba kombatente sira, tanba durante funu libertasaun nasionál, família hotu indika sira-nia an atu lori rai ne’e ba ukun rasik-an.
“Tanba sei la’ós ita-boot sira partisipa másima ba ita-nia funu libertasaun, ohin loron ita laiha ukun rasik-an ida-ne’e, tan ne’e maka Estadu kada tinan sempre fó kondekorasaun, hanesan rekoñesimentu ida ba ita+boot sira-nia servisu tomak ba Estadu ida-ne’e,” nia katak.
Nia relembra, iha tempu pasadu, hirak-ne’ebé hola partisipa iha servisu ne’e, lá ejize buat ida, maibé hanoin ida de’it, katak rai ne’e tenki ukun rasik-an, lá husu transporte ho orsamentu ruma atu halo servisu.
“Maibé orden komandu da luta haruka, ita bo’ot sira hamrik la’o daudaun kedas ona, ida-ne’e maka Estadu haree, katak exemplu di’ak tebes ba joventude sira agora, ba sira-ne’e kontinua, hatutan ita-nia servisu ne’e banati tuir saida mak uluk halo ba rai ne’e,” nia fó apela.
Sekretáriu Rejionál ba Asuntu Administrasaun, Martinho Abani Elo, reprezenta Autoridade RAEOA, fó hanoin ba kombatente atu sai matadalan iha sosiedade ho ambiénte amizade iha nivél aldeia no suku.
“Ho rekoñesimentu hosi Estadu no Governu bai ta-bo’ot sira, persiza hatudu exemplu hanesan veteranu, iha suku no aldeia sira mosu problema ruma, ita bo’ot maka sai matadalan, katak ukun rasik-an ne’e la fasíl tanba ema barak fakar ran, tan ne’e unidade tenki mai hosi ita-hotu,” na fó hanoin.
Veretanu Costancio Suni, orgullu, tanba kondekorasaun ne’e importante atu valoriza dedikasaun iha tempu okupasaun.
“Moto veteranu hatudu, veteranu mak rin ba nasaun no na’in ba ukun rasik-an, ida-ne’e mak ohin ita orgullu tanba Estadu Timor-Leste, lahaluha ita-nia susar terus, ida-ne’ebé uluk ita halo ona, ho mehi ida katak, Timor-Leste tenki hetan ukun rasik-an,” nia orgullu.
Notísia relevante:Veteranu 50 iha RAEOA simu kondekorasaun ho orden Nicolau Lobato
Entretantu tuir livru 3-C, Orsamentu Jerál Estadu (OJE) 2023 RAEOA-ZEESM Timor-Leste, haktuir benefisiáriu ne’ebé hetan apoiu osan Estadu iha RAEOA ba kombatente ou veteranu libertasaun nasionál hamutuk ema na’in-363, no martires libertasaun nasionál hamutuk ema na’in-223.
Jornalista: Abílio Elo Nini
Editór: Evaristo Soares Martins
