DILI, 05 janeiru 2024 (TATOLI) – Ministru Juventude Desportu Arte no Kultura (MJDAK) Nelyo Isaac Sarmento, hateten Timor-Leste (TL) sei hasoru eventu boot rua iha 2025. Ida mak sai uma-nain ba jogu CPLP no ida seluk mak Sea Games iha Thailandia.
“Tinan ida-ne’e hanesan tinan krusiál ba ita-nia atleta sira, tanba iha tinan 2025 ita sei hasoru eventu boot rua hanesan Sea Games iha Thailandia, aleinde ne’e ita mak sei sai mós uma-nain ba jogu CPLP, entaun ita nia atleta sira tenke prepara aan makas atu defende ita-nia nasaun”, Ministru Nelyo dehan ba jornalista sira iha edifísiu MJDAK Lecidere, ohin.
Tanba ne’e, hosi fevereiru komesa iha ona konsolidasaun atu prepara atleta no prepara kalendáriu ba kompetisaun modalidade sira ne’ebé atu ba kompete iha Sea Games Thailandia 2025.
“Iha tinan ida-ne’e ita sei konsentra atleta sira hotu iha fatin ida para halo preparasaun ne’ebé másima no Governu sei fó intensivu ba atleta hotu durante tinan ida sira-nia preparasaun”, nia friza.
Kona-ba modalidade hira mak sei kompete, komisaun sei avalia atu foti desizaun ba modaliade hirak ne’ebé iha prestasaun atu bele ba kompete.
“Kona-ba modalidade hira mak sei ba kompete ha’u seidauk bele fó sai ba ita-boot sira tanba ami sei halo lai avaliasaun mak hatene, hanoin modalidade la presiza barak haree de’it sira ne’ebé iha prestasaun no kondisaun”, nia relata.
Enkuantu, kona-ba jogu CPLP nian, Governu iha ona planu atu hadia infraestrutura desportu nian hotu iha teritóriu nasionál durante tinan ida no governante ne’e fiar katak TL sei sai uma-na’in iha eventu ne’e ho susesu.
Jornalista: Hortencio Sanchez
Editór : Zezito Silva
