DILI, 05 janeiru 2024 (TATOLI)—Governu Timor-Leste hato’o ninia solidariedade ba povu no Governu Japaun, relasiona ho rai nakdoko ho magnitude 7,6 iha eskala ne’ebé to’o iha Peninsula Noto iha Ishikawa, Japaun, iha segunda (01/02).
“Porta-vóz Governu Konstitusional IX, Ministru Agio Pereira, aprezenta ninia kondolénsia ba povu no Governu Japaun no saúda ekipa sira hotu ne’ebé kontinua buka tuir ema ne’ebé lakon no apoiu populasaun ne’ebé afetadu hosi dezastre ne’e,” refere nota ne’ebé Agência Tatoli asesu, sesta ne’e.
Dezastre naturál ne’e estraga edifísiu no estrada no ema hamutuk na’in-84 lakon vida, kanek 300 resin no ema atus ba atus mak lakon.
Notísia relevante : Embaixadór Timor-Leste ba Japaun konfirma timor-oan na’in-54 ho kondisaun di’ak
Aleinde ne’e, komunidade barak kontinua laiha bee no naroman, enkuantu ekipa salvasaun kontinua buka sobrevivente sira.
Entretantu, Ajénsia Meteorolojia Japaun (JMA) informa katak akontese mós rai nakdoko kontinuasaun dala-155 hahú kedas hosi loron dahuluk rai nakdoko.
Dadaun ne’e, komunidade Ishikawa hamutuk 62 mak lakon vida, no ekipa kontinua buka abitante seluk.
Aleinde iha Ishikawa, deteta mós rai nakdoko iha fatin seluk iha Japaun hanesan Niigata, Toyama, Fukui, Nagano, Gifu, Tokyo, Yamagata, Fukushima, Ibaraki, Tochigi, Gunma, Saitama, Shizuoka, Aichi, Mie, Shiga, Kyoto, Osaka, Hyogo, Nara, Tottori, Iwate, Miyagi, no Akita.
Jornalista : Antónia Gusmão
Editora : Julia Chatarina
