DILI, 09 janeiru 2024 (TATOLI) – Prezidente Repúblika (PR), José Ramos Horta, hasoru malu ho Primeiru-Ministru Shri Narendra Modi iha Gandhinagar Índia iha ne’ebé Índia prontu apoiu Timor-Leste nia dezenvolvimentu iha área oioin (Múltiplu setór).
“Primeiru-Ministru Índia Shri Narendra Mondi kompremetidu katak sei tulun Timor-Leste iha area dezenvolvimentu, kapasitasaun umana, Informasaun tekonolojia, saúde inklui fornese ai-moruk tradisionál no farmaseútika”, hatete iha komunikadu ne’ebé Agência TATOLI asesu hosi media gabinete PR, ohin.
Primeiru-Ministru Mondi mós hato’o nia benvindu ba Xefe Estadu ho delegasaun sira ne’ebé sei partisipa iha simeira Gujarat ba dala-10.
Sorumutu entre líder na’in rua ne’e hanesan primeira vizita Estadu no Governu nian entre nasaun rua Timor-Leste no Repúblika Índia.
Primeiru-Ministru Mondi komprometidu katak sei hametin liután relasaun bilaterál entre nasaun rua ne’e nian iha futuru.
Prezidente Horta hato’o nia agradesimentu ba Primeiru-Ministru Mondi nia konvite hodi bele partisipa iha simeira ida-ne’e.
Xefe Estadu husu mós ba Governu Índia nia apoiu, atu bele tulun Timor-Leste, liuliu iha área saúde no seluk tan.
Horta hateten, Timor-Leste mós sei apoia makas ba Índia nia misaun permanente iha membru Konsellu Seguransa ONU nian. Lider rua ne’e kompromete katak sei servisu hamutuk liután iha arena multilaterál.
Xefe Governu Mondi fó mós apresiasaun ba Timor-Leste nia partisipasaun ativu iha edisaun daruak Simeira Voz Sul Globál nian (Voice of Global South Summit). Sira konkorda hamutuk katak nasaun hothotu ne’ebé hamahan aan iha “Global South Summit” ne’e, tenke reforsa sira pozisaun iha kestaun globál nian.
Mondi mós felisita ba Prezidente Horta kona-ba desizaun no prinsípiu ASEAN nian hodi rekoñese Timor-Leste nu’udar membru ba dala 11 no nia espera katak Timor-Leste nia adezaun ne’e, bele alkansa iha tempu badak.
Relasaun bilaterál Timor-Leste no Índia ho valór demokrásia sira no pluralidade ne’ebé hanesan. India mak nasaun primeiru ne’ebé estabelese relasaun diplomátika dezde 2003.
Jornalista: Hortencio Sanchez
Editór : Zezito Silva
