DILI, 10 janeiru 2024 (TATOLI)—Sekretaria Estadu Floresta (SEF) iha inisiativa buka dalan atu asegura kontratadu guarda florestál sira ne’ebé kontratu ramata ona iha loron 31 dezembru 2023.
“Loos duni. Ita-nia kazuál guarda florestál sira-nia kontratu mate iha loron 31 dezembru 2023, ida-ne’e la’ós membru ida mak hakarak hasai sira maibé kontratu mak ramata duni. Iha tempu badak membru Governu sei ko’alia hodi buka dalan hamutuk asegura nafatin sira, signifika sei to’o extende kontratu,” Sekretáriu Estadu Floresta, Fernandino Vieira da Costa, informa ba Agência Tatoli, iha edifísiu Agência Tatoli, Farol, kuarta ne’e.
Governante ne’e hato’o lia hirak ne’e relasiona ho preokupasaun guarda florestál na’in-18 iha munisípiu Covalima ne’ebé kontratu ramata ona iha loron 31 dezembru tinan kotuk, maibé daudaun ne’e kontinua serbisu ho voluntáriu hodi hein desizaun Governu.
Aleinde ne’e, guarda florestál iha munisípiu seluk mós enfrenta situasaun hanesan.
Notísia relevante : Kontratadu Guarda Florestál Covalima serbisu ho voluntáriu hodi hein desizaun
Sekretáriu Estadu konsidera prezensa kazuál guarda florestál ne’e importante tebes.
“Prezensa guarda florestál sira ne’e ita presiza tebes tanba antes sira tama mós liuhosi prosesu naruk, hahú hosi rekrutamentu, treinamentu to’o hetan ona esperiénsia mak sai guarda florestál. ne’ebé sei asegura sira hotu, tanba ita foti foun mós sei presiza gasta fali osan, tempu no seluk tan,” nia tenik.
Daudaun ne’e rejista guarda florestál 304 iha territóriu tomak, ne’ebé hosi númeru ne’e balun permanente no seluk hanesan kazuál.
Jornalista : Arminda Fonseca
Editora : Julia Chatarina
