BOBONARO, 11 janeiru 2024 (TATOLI)-Servisu Rejistu no Verifikasaun Emprezariál, Institutu Públiku (SERVE,IP.) sukursál munisípiu Bobonaro, hahú hosi fulan-janeiru to’o dezembru tinan 2023 rekolla reseita hamutuk $14,459.15 hodi kontribui ba kofre Estadu.
Koordenadór SERVE,IP Munisípiu Bobonaro, Leopoldo Perreira Fernandes, esplika, reseita hirak-ne’e rekolla liuhosi atividade kliente sira mai halo renovasaun ba dokumentu sira hanesan sertidaun ba rejistu komersiál, re-imprime sertifikadu ba rejistu komersiál no renovasaun ba ezersísiu atividade ekonómiku ne’ebé sujeta ba setoriál selu taxa $60.00 kada atividade tuir dekretu lei númeru 83/2022, 23 novembru.
Alende ne’e rekolla mos hosi atividade ne’ebé kliente sira mai hato’o alterasaun objetu, aumenta atividade, alterasaun sede, administrador, órgaun sosiál, kapitál sosiál no seluk tán bazea ba pedidu ne’ebé submete hosi negosiante no emprezáriu sira.
“Totál reseita ne’ebé rekolla hosi fulan jeneiru to’o fulan dezembru 2023 hamutuk $14,459.15,” nia informa ba Agência Tatoli iha Maliana, kinta ne’e.
Enkuantu tuir dadus negosiante no empreza ne’ebé rejista iha SERVE,IP sukursál Bobonaro iha tinan 2023 hamutuk 257.
Hosi totál ne’e komposta hosi mane 175 no feto 82, kompostu hosi Emprezáriu Em Nome Individuál (ENIN) na’in 146, Sosiedade Unipesoál Por Quotas Limitada (Unipesoál LDA) 101, Sosiedade Por Quotas Limitada (LDA) 10.
Notisia relevante: Tinan 2022, SERVE Bobonaro rekolla reseita $8,258.45
Jornalista: Sergio da Cruz
Editór: Evaristo Soares Martins
