DILI, 17 janeiru 2024 (TATOLI)—Governu liuhosi reuniaun ordinária Konsellu Ministru (KM), kuarta ne’e, aprova projetu rezolusaun Governu ne’ebé aprezenta hosi Vise-Ministra Solidariedade Sosiál no Inkluzaun, Céu Brites.
“Projetu rezolusaun ne’e ba nomeasaun Arlindo Pinto ba kargu Prezidente Konsellu Administrasaun Institutu Nasionál Seguransa Sosiál, nune’e mós hanesan Prezidente Konsellu Fundu Rezerva Seguransa Sosiál, ba mandatu tinan-tolu,” Ministru Prezidénsia Konsellu Ministru, Agio Pereira, relata hafoin reuniaun ezekutivu, iha Palásiu Governu.
Governu deside Arlindo Pinto lidera INSS tanba konsidera pesoál ne’e iha reputasaun di’ak no durante ninia karreira profisionál, hala’o ona knaar ne’ebé halo nia iha koñesimentu, formasaun téknika no esperiénsia kualifikada ne’ebé hatudu kapasidade diresaun no hatudu ninia adekuasaun perfil hodi dezempeña kargu ida-ne’e.
Notísia relevante : Governu ezonera Longuinhos Armando hosi kargu Prezidente INSS
Antes ne’e, iha segunda (15/01) , Governu liuhosi reuniaun Konsellu Ministru estraordináriu, deside hodi ezonera Longuinhos Armando hosi kargu Prezidente Konsellu Administrasaun INSS, ne’ebé ninia mandatu loloos termina iha tinan 2025.
Jornalista : Antónia Gusmão
Editora : Julia Chatarina
