DILI, 17 janeiru 2024 (TATOLI)—Governu iha ámbitu reuniaun ordinária Konsellu Ministru (KM), kuarta ne’e, delibera hodi aprova akordu entre Ministru Planeamentu no Investimentu Estratéjiku Repúblika Demokrátika Timor-Leste no Ministériu Obra Públika no Abitasaun Repúblika Indonézia ba kooperasaun iha área dezenvolvimentu infraestrutura.
Proposta ne’e aprezenta hosi Ministru Planeamentu no Investimentu Estratéjiku, Gastão Francisco de Sousa.
“Memorandu entendimentu ne’e ho objetivu atu hametin no habelar kooperasaun entre parte rua tuir prinsípiu igualdade, resiprosidade no benefísiu hamutuk. Foku prinsipál maka haluan kolaborasaun iha setór dezenvolvimentu infraestruturas no área sira ne’ebé iha relasaun, hodi adota abordajen ida ne’ebé efisiente, efikás no olístika,” Ministru Prezidénsia Konsellu Ministru, Agio Pereira, hateten hafoin reuniaun ezekutivu, iha Palásiu Governu.
Notísia relevante : Japaun kompromete apoiu TL iha dezenvolvimentu infraestrutura
Liuhosi reuniaun ezekutivu ne’e atribui mós poder tomak ba Ministru Gastão de Sousa hodi asina akordu refere.
Tuir akordu, país rua ne’e sei fahe koñesimentu, kompeténsia no esperiénsia iha ámbitu dezenvolvimentu infraestrutura, ho objetivu ba moris!di’ak populasaun.
“Kooperasaun ida-ne’e sei serbí ba interese komún no sei kontribui hodi hametin kolaborasaun bilaterál entre país rua ne’e tuir lei no regulamentu sira ne’ebé vigora iha país ida-idak nian,” Ministru tenik.
Jornalista : Antónia Gusmão
Editora : Julia Chatarina
