BOBONARO, 22 janeiru 2024 (TATOLI) – Autoridade Munisípiu Bobonaro (AMB), segunda ne’e realiza serimónia fahe envelope orsamentu fiskál tinan 2024 ba diresaun servisu munisipál 10 no postu administrativu neen; Atabae, Balibo, Cailaco, Maliana, Bobonaro no postu administrativu Lolotoe.
Totál orsamentu ne’ebé autoridade munisipíu Bobonaro hetan alokasaun hosi Governu Sentrál ba tinan 2024 hamutuk $9,270,244.00, montante ne’e fahe ba Saláriu no vensimentu $1,913,760.00, bens no servisu $897,486.00, kapitál Menór $233,998.00, kapitál dezenvolvimentu $2,518,287.00 no transferénsia públika $3,706,713.00.
Orsamentu ne’e hodi finánsia ba programa 12, sub-programa 29 ho totál atividade 63 bazea ba planu asaun anuál ne’ebé aprezenta kada diresaun servisu munisipál.
Enkuantu distribuisaun tetu orsamentu 2024 ne’e ba Sekretáriadu Munisipál Autoridade Bobonaro hamutuk $5,137,446 (55%), Servisu Munisipál Saúde 214,699 (2%), Servisu Munisipál Edukasaun $2,763,745 (30), Servisu Munisipál Agrikultura $505,793 (6%).
Nune’e mós Obra Públika $137,007 (2%), Água no Saneamentu $190,760 (2%), Jestaun Merkadu no Turizmu $25,202 (0%), Rejistu Notariadu no Kadastru $27,249 (0%), Potesaun Sivíl no Dezastre Naturál $63,438 (1%), Seguransa Alimentár $28,366 (0%), Postu Administrativu neen $98,553 (1%) no Asaun Sosiál $77,986 (1%).
Prezidente Autóridade Munisipíu Bobonaro, Ernesto de Oliveira Barreto, husu ba diretór servisu munisipál hotu no administradór postu sira atu ezekuta orsamentu refere ho responsabilidade.
Notísia relevante: Autoridade Bobonaro propoin PDIM 11 iha OJE 2023
“Tinan uluk ita iha milaun $5, tinan ida liubá ne’e ita iha millaun $6, maibé kapitál dezenvolvimentu la fó ida, tinan ne’e kapitál dezenvolvimentu millaun $2,5, ne’e hakarak ka lakohi tenke implementa ho susesu, tinan oin ita atu hetan orsamentu barak ho oituan ne’e, ida agora millaun $2,5 mak determina, se lae nia afeta bainhira atu hakat ba podér lokál,” nia hateten iha salaun enkontru administrasaunh munisipál Bobonaro
Diretór Finansa Autoridade Munisípiu Bobonaro, Elizeu Lopes de Araújo, reforsa alokasaun orsamentu tinan ne’e bootliu ba programa merenda eskolár purvolta millaun $1-resin ne’ebé sei ezekuta ba loron efetivu 191-resin ho totál alunu rihun 30-resin.
Orsamentu hosi Sekretariadu Munisípiu sei aloka hodi sosa ekipamentu informátiku no mobiliáriu ba sekretáriadu Autoriade Munisipíu na’in-tolu ho nia montante orsamentu rihun $233, inklui insentivu ba estrutura suku hamutuk ema na’in-haat komposta hosi sekretariadu suku, ofisiál apoia finansa, administrasaun no sosiál.
Enkuantu millaun $2,5 ba kapitál dezenvolvimentu ne’e sei implementa projetu 14, hosi númeru ne’e inklui projetu sira on going hela ne’e.
Rekorda fali katak, tinan 2023 ne’e autoridade munisípiu Bobonaro hetan alokasaun $6,737,418.50. Montante ne’e fahe ba kategoria saláriu no vensimentu $2,110,019.00, bens no servisu $550,672.50, kapitál menór $348,586.00, kapitál dezenvolvimentu $209,747.00 no transferénsia públika $3,518,394.00.
Notísia relevante: IX Governu presiza konsidera estrada Bobonaro-Lolotoe iha OJE 2024
Jornalista: Sérgio da Cruz
Editór: Evaristo Soares Martins
