COVALIMA, 01 fevereiru 2024 (TATOLI) – Administrasaun Munisípiu Covalima asina ona kontratu, iha jeneiru, ho empreza Sabudoy atu raut lixu iha merkadu Debos nomós iha fatin sira seluk iha postu administrativu Suai, munisípiu Covalima.
Diretór Servisu Água, Saneamentu no Ambiente, Moises Luta Mau Vicente, informa katak kontratu ne’ebé halo ho empreza ne’e ho durasaun fulan tolu, no daudaun hala’o ona knaar rekolla lixu sira, nune’e fo’er sira la akumula ona.
“Tanba kompañia Sabudoy asina kontratu ho tipu emerjénsia, ne’ebé nia durasaun fulan tolu hahú iha fulan-janeiru to’o fulan marsu tinan ne’e. Autoridade Covalima kontrata tanba simu krítika husi komunidade sira, tanba lixu akumula iha merkadu no namkari to’o estrada públiku , iha merkadu debos no mós iha fatin sira seluk”, dehan.
Moises Vicente salienta katak maske kontrata ona empreza atu rekolla lixu, maibé laiha ema atu raut tanba seidauk estende kontratu pesoál Servisu Munisipál Água, Saneamentu no Ambiénte hamutuk 22, inklui ajente na’in tolu. Daudaun hein de’it Prezidente Autoridade foun atu estende sira-nian kontratu.
Bainhira jornalista tenta atu halo konfirmasaun ho Diretór ServisuAprovizionamentu, Alarico do Nascimento, kona-ba autoridade Covalima asina kontratu ho empreza Sabudoy, maibé lakohi fó komentáriu.
Razaun diretór lakoi fó kometáriu, tanba nia mandatu asume kargu remata ona iha fulan-janeiru no Ministériu Administrasaun Estatál mós fó sai ona lista diretór servisu munisipál foun.
Tuir observasaun, daudaun ne’e iha fatin lixeiru sira la akumula ona fo’er sira hanesan iha merkadu Debos, bairru Santa-rosa no fatin sira seluk tan.
Notísia relevante: Lixu akumula iha merkadu Debos tanba laiha pesoál limpeza
Jornalista: Celestina Teles
Editora: Maria Auxiliadora
