DILI, 05 fevereiru 2024 (TATOLI) – Prezidente Tribunál Rekursu (PTR), Deolindo dos Santos, hateten Tribunál Rekursu (TR) notifika ona Parlamentu Nasionál (PN) no Prokuradoria Jerál Repúblika (PGR, sigla portugés) atu hato’o pareser kona-ba lei prosedimentu konsensaun indultu no komutasaun pena ne’ebé submete hosi deputadu sira 1/5 atu halo fiskalizasaun abstrata.
“Tribunál Rekursu simu ona pedidu fiskalizasaun abstrata lei indultu ne’ebé aprezenta hosi Deputadu 1/5 (um quinto deputado) mai Tribunál Rekursu. Hanesan Prezidente Tribunál ha’u haree ona pedidu ne’e no ami notifika ona Parlamentu Nasionál no Prokuradoria Jerál Repúblika atu sira bele hato’o sira-nia pareser ruma kona-ba lei indultu”, Deolindo dehan ba jornalista TATOLI hafoin partisipa serimónia aniversáriu ezisténsia tranformasaun FALINTIL ba F-FDTL ba dala 23 ne’ebé halo iha kuartel Jenerál F-DTL Fatuhada, foin lais.
Nia dehan, TR notifika mós PGR tanba nu’udar orgaun ida ne’ebé nain ba prosesu penál sira, tanba ne’e husu pareser kona-ba pedidu fiskalizasaun lei indultu nian.
“Pareser sira-ne’e, mai ami sei haree no análize didi’ak molok foti desizaun. Ha’u dehan ba ita bo’ot sira katak tempu badak nia-laran ami sei deside”, nia adianta.
Deolindo dehan, desizaun ba pedidu fiskalizasaun abstrata ba lei indultu ne’e sei deside liuhosi plenária Tribunál Rekursu, la’os desizaun hosi Prezidente Tribunál nian de’it.
“Ha’u atu dehan ba ita bo’ot sira katak desizaun ba pedidu fiskalizasaun abstrata ba lei indultu ne’e atu konstitusionál ka inkonstitsionál, desizaun ne’e deside iha plenária Tribunál Rekursu”, nia konklui.
PDHJ mós submete pedidu fiskalizasaun abstrata lei indultu ba TR
Prevedór Diretus Humanus Justisa (PDHJ), Virgílio Guterres, submete pedidu ida ba Tribunál Rekursu (TR) hodi husu fiskalizasaun abstrata lei kosensaun indultu no komuntasaun pena.
“Ohin ami mai entrega pedidu ida ba Tribunál Rekursu, iha ami-nia pedidu ne’e husu Tribunál atu halo fiskalizasaun abstratu ba lei indultu”, Virgílio Guterres hateten ba jornalista sira hafoin entrega pedidu fiskalizasaun abstrata lei indultu ba Tribunál Rekursu iha Caicoli, sesta-feira, (02/02/2024).
Nia esplika, PDHJ hato’o pedidu fiskalizaun abstrata ho razaun katak prizioneiru balun ne’ebé kumpre ona pena prizaun maibé to’o agora seidauk hetan indultu, enkuantu balun la kumpre prizaun ka liuhosi prosesu julgamentu, Prezidente Repúblika, José Ramos Horta fó indultu imediatu bazeia ba lei konsesaun indultu no komutasaun pena ne’ebé Xefe Estadu promulga iha 12 dezembru 2023.
“Ida-ne’e hamosu injustisa, tanba konstituisaun garante katak sidadaun hothotu iha direitu atu hetan tratamentu ne’ebé justu, hothotu hanesan iha lei nian oin. Iha ema balun tama prizaun no kumpre pena no hein hela atu fó indultu maibé seidauk hetan, maibé balun la tama prizaun no sees hosi julgamentu hetan fali indultu, entaun haree hosi prinsípiu justisa, ida-ne’e kontra prinsípiu konstitusionál“, nia afirma.
Nia subliña, PDHJ mós komunga saida mak preokupasaun públika nian katak prosesu atu fó indultu ne’e tenke iha kritériu ne’ebé klaru.
“Rekezitu mak tenke hanesan lei ida uluk katak ema atu hetan indultu tenke kumpre ninia pena prizaun no atu hetan indultu tenke propoen hosi Minstériu Justisa’’, nia konklui.
Jornalista: Natalino Costa
Editór : Zezito Silva
