DILI, 08 fevereiru 2024 (TATOLI)–Antigu Vise-Prezidente Asuntu Infraestrutura Kámara Komérsiu Indústria Timor-Leste (CCI-TL, sigla portugés), João Fernando Alves, hakotu iis iha kuarta (07/02) ho idade 63.
Ivan Alves nu’udar oan-mane boot, haktuir katak João Alves hakotu iis iha Hospital Nacionál Guido Valadares (HNGV) tanba sofre moras fuan (kardiovaskulár). Nia monu bainhira halo hela aprezentasaun ne’ebé organiza hosi Fórum ONG Timor-Leste (FONGTIL).
“To’o hakotu iis, ha’u rasik lahatene loloos ninia kronolojia tanba ha’u iha hela serbisu fatin maibé dadeer hanesan baibain nia sai hosi uma, nia bá to’o serbisu fatin, meiudia fila mai uma halimar ho nia bei-oan sira, iha lorokraik nia bá fali serbisu no halo aprezentasaun ida iha FONGTIL. Durante aprezentasaun nia kala sente ona buat ruma entaun husu pausa minutu lima hodi hola anin tanba kosar, bainhira sai ba li’ur, nia monu no seguransa sira mak haree, telefone mai ami dehan lori ona ba sentru Vera Cruz, bainhira ha’u to’o ne’ebá sira informa katak nia kondisaun tama ona iha faze grave, pesoál saúde sira halo esforsu boot to’o minutu 40 maibé lakonsege no kontinua lori ba HNGV to’o ne’ebá médiku sira halo esforsu hotu maibé to’o kuarta lorokraik tuku 16:15 otl pai husik iis,” Ivan haktuir iha rezidénsia Palapaço, kinta ne’e.
Notísia relevante : Impase Polítika, Empreza 80 Taka Atividade
Tuir Ivan, maski nia pai hanesan ema ida okupadu ho ninia atividade nu’udar emprezáriu, maibé sempre buka tempu hodi hamutuk ho família.
“Pai ema ida hakarak koñese ema no di’ak ba ema hotu, ami oan konsidera pai hanesan ema ne’ebé ezemplár, nu’udar aman no mane nia hanesan ezemplu boot tebes ba ami,” nia akresenta.
Iha biban hanesan, Antigu Prezidente CCI-TL no atuál deputadu bankada parlamentár FRETILIN, Oscar Lima, sente lakon belun di’ak ne’ebé kontribui maka’as ba nasaun liuhosi atividade nu’udar emprezáriu.
“Ha’u koñese di’ak maktoban João Alves tanba ligasaun família oitoan. Aleinde ne’e, ami na’in-rua serbisu hamutuk bainhira ha’u sei asume hela Prezidente Kámara Komérsiu Indústria Timor-Leste, buat ida ha’u haree hosi nia maka nia ema ida badinas no hakarak kontribui ba nasaun ne’e di’ak tebes. Ami-rua serbisu hamutuk durante tinan-ualu iha CCI-TL, maski agora nia laiha ona estrutura CCI nian maibé ninia kontribuisaun nu’udar emprezáriu nasionál sei maka’as hela,” Oscar Lima fó sasin.
João Fernando Alves moris iha postu administrativu Laclo, munisípiu Manatuto iha loron 05 fevereiru 1961, husik hela feen Rosa Caldas Ferreira no oan na’in-hitu (mane lima no feto rua). Nia nu’udar emprezáriu nasionál, ne’ebé iha mandatu I Governu Konstitusionál (2003) nu’udar Sekretáriu Estadu Obra Públika no asume kargu Vise-Prezidente asuntu infraestrutura CCI-TL durante períudu rua (tinan 2014-2018 no 2018-2022).
Família konkorda ona atu haloot matebian iha semitériu públiku Bekusi iha loron domingu (11/02).
Jornalista : Antónia Gusmão
Editora : Julia Chatarina
