VIQUEQUE, 29 fevereiru 2024 (TATOLI)- Ministériu Transporte Telekomunikasaun (MTK) liuhosi Diresaun Nasionál Transporte Terreste (DNTT) nasionál instala ona ekipamentu ka mákina prodús dokumentu libreti ka SNTK ba transporte hanesan motór no karreta nian iha munisípiu Viqueque.
Diretór Diresaun Nasionál Transporte Terrestre (DNTT), munisípiu Viqueque, Saul Henrique, informa, durante laiha mákina prodús ne’e funsionáriu DNTT tenke sakrifika aan hodi lori dokumentu libreti ba munisípiu Baucau maka foin prodús.
“Ami hamutuk ho ekipa nasionál instala hotu ona ekipamentu sira-ne’e. Ho ida-ne’e ha’u sente ita bele aselera prodús libreti sira-ne’ebé oras-ne’e barak mak sei rai iha ami-nia edifísiu”, hatete Diretór ne’e ba Agência TATOLI, iha postu Viqueque Vila, ohin.
MTK ho DNNT munisipálinstala hotu ona inklui monta mós rede internet tanba prosesa libreti ne’e sei liuhusi sistema base dadus.
Ho instasaun ne’e, nia promote funsionáriu DNTT sei aseleira serbisu atendimentu lalais hodi produs dokumentu libreti sira-ne’e hodi atribui ba utilizadór tranporte sira iha munisípiu Viqueque.
Tuir dadus dokumentu libreti ne’ebé rai iha DNTT Viqueque hahú husi fulan juñu tinan 2023 purvolta 200 resin maka sei rai iha edifísiu. Nune’e tuir planu funisionáriu DNTT Viqueque sei hahú halo atendimentu ba dokumentu libreti iha tersa semana oin.
Alende instala ekipamentu prodús libreti, ekipa husi nasionál akompaña funsionáriu no kapasita funsionáriu DNTT na’in-10 kona-ba utulizasaun ba prosesamentu dokumentu libreti nian atubele atende kliente sira-nia dokumentu.
Notísia relevante:DNTT Viqueque rekolla taxa $57.000 iha tinan 2022
Jornalista : Vitorino Lopes da Costa
Editór : Florencio Miranda Ximenes
