VIKEKE, 26 Juñu 2026 (TATOLI)—Prezidente Konsellu Kombatente Libertasaun Nasionál (CCLN-sigla portugeza) Munisípiu Vikeke, Adriano Câmara ‘Lentil, relembra katak bainhira militar Indonézia kaputura líder másimu Kay Rala Xanana Gusmão, saudozu Lú Olo mak fó aten-brani ba asua’in sira hodi kontinua rejiste iha ai-laran.
“Saudozu nian sakrifísiu no nia vida tomak ami hamutuk iha rezisténsia armada, agora ami tenke relemabra filafali ami-nia pasadu. Terus ne’ebé ami hasoru iha prosesu luta libertasaun laran, ami enfrenta situasaun oioi, ami enfrenta buat ne’ebé ema barak la auguenta. Maibé, ami kontinua hamutuk ho Saudozu Lú Olo ho kompaineru-da-luta sira seluk, ami konsege hamutuk hodi fó hanoin ba malu oinsá mak ita bele rejista nafatin no kaer malu metin hodi hakotu ita-nia funu ida-ne’e,” Lentil ba TATOLI iha Postu Vikeke Vila, Sábadu ne’e.
Notísia relevante: Lú Olo nia falesimentu fó forsa hodi kontinua luta bá-oin
Sasin moris Saudozu Antigu Prezidente Lú Olo ne’e konta, iha loron 20 fulan-Novembru 1992, ema kaputura komadante Ein-Xefe FALINTIL Xanana iha kapitál Díli, soldadu barak mak sai dezmoralizadu tanba ema katura ona líder másimu ba prosesu luta libertasaun nasionál laiha ona ema ida hodi dirije funu.
“Entaun, iha momentu ne’ebá, Saudozu Lú Olo apela ba soldadu sira hotu katak kuandu ema kaer ona Xanana mak prosesu funu bele la’o bá-oin. Enkantu, ema la kaer Xanana no mate de’it iha ai-laran, ita-nia prosesu sira sei la la’o. Tanba sé mak hala’o prosesu ida-ne’e ema tenke kaptura Xanana para prosesu luta ba ukun-an la’o bá-oin, atu mundu hatene líder rezisténsia ema kaptura ona, hodi ema husi organizasaun internasionál sira bele ba vizita, atubele ko’alia sai ita-nia luta ba mundu no mundu bele hatene ita-nia luta. Husi mensajen sira-ne’e mak ita-nia saudozu fahe ba soldadu sira iha tempu rezisténsia hodi haforsa espirítu funu-na’in sira atu kontinua reziste iha ai-laran,” nia konta.
Nia mós lembra katak akontesimentu levantamentu armada iha 1983 iha Munisípiu Vikeke, Saudozu Lú Olo mak organiza hamutuk ho kompañeiru-da-luta sira hodi inisia levantamentu ne’ebé akontese iha Kraras no Buanurak.
Lentil informa veteranu sira iha Munisípiu Vikeke sente lakon boot kompañeiru-da-luta ida iha sira-nia sorin.
“Ami veteranu Munisípiu Vikeke nia sentimentu tristeza boot tanba lakon kompañeiru ne’ebé moris hamutuk iha ai-laran durante luta rezisténsia ida naruk,” nia triste.
Iha biban ne’e, veteranu ne’e solisita jerasaun foun tenke estuda maka’as hodi sai matenek tanba futuru nasaun Timor-Leste iha jerasaun foun sira-nia liman, tan ne’e presiza matenek hodi lori nasaun bá-oin.
Jornalista: Vitorino Lopes da Costa
Editór: Xisto Freitas da Piedade
