VIQUEQUE, 11 janeiru 2023 (TATOLI)–Servisu Diresaun Nasionál Transporte Terrestre (DNTT) munisípiu Viqueque rekolla taxa $57.000 hosi atividade inspesaun motór, karreta, lisensa tránzitu no karta kondusaun ba kofre Estadu, iha tinan 2022.
“Maski durante ne’e ami sempre hasoru dezafiu oin-oin, maibé ami konsege rekolla taxa hodi hatama ba kofre Estadu, nune’e tinan ne’e ami sei kontinua esforsu hodi rekolla taxa,” Diretór DNTT Viqueque, Elvino da Cruz, informa ba Agência Tatoli, iha ninia knaar fatin, Beloi, kuarta ne’e.
Notísia relevante: DNTT Viqueque distribui karta kondusaun ba motorista na’in-648
Aleinde ne’e, dezafiu ne’ebé durante ne’e DNTT enfrenta durante ne’e mak seidauk iha edifísiu própriu no seidauk iha instalasaun internet, nune’e difikulta servisu atendimentu públiku.
“Mákina halo karta kondusaun oras-ne’e iha ona nasionál, maibé hodi kalan sira telefone ha’u labele monta mákina iha Viqueque tanba liña fibra ótika seidauk iha. Ida-ne’e sai hanesan dezafiu ida ba ami hodi rezolve ema-nia dokumentu, entaun dokumentu karta kondusaun sei nafatin prodús iha Baucau,” nia akresenta.
Ba kestaun ne’e, DNTT Viqueque halo koordenasaun ho Diretór DNTT Baucau hodi halo serbisu di’ak liután.
“Ida-ne’e sai hanesan alternativa ida ne’ebé tenke halo duni tanba ita iha ona ekipamentu, maibé ita labele lori mai instala iha munisípiu Viqueque. Tanba ne’e, ha’u mak halo liña koordesaun ida ho Baucau hodi oferese fatin ruma hodi ami bele tau ami-nia funsionáriu Viqueque iha ne’ebá,” nia tenik.
Jornalista : Vitorino Lopes da Costa
Editora : Julia Chatarina
