HEADLINE, MUNISÍPIU, VIQUEQUE

DNTT Viqueque distribui karta kondusaun ba motorista na’in-648

DNTT Viqueque distribui karta kondusaun ba motorista na’in-648

Diretór Nasionál Transporte Terrestre Viqueque, Elvino da Cruz. Imajen Tatoli/Vitorino Lopes da Costa

VIQUEQUE, 10 janeiru 2023 (TATOLI)–Diresaun Nasionál Transporte Terrestre (DNTT) Viqueque, tersa ne’e, distribui ona karta kondusaun ba motorista sira ne’ebé liu ona teste.

“Ami loke aplikasaun karta kondusaun iha munisípiu Viqueque iha novembru no dezembru 2022, iha motorista hamutuk 648 maka rejista no sira tuir teste eskrita no prátika tama roda iha segunda horiseik (09/01) no ohin ami atribui simbolikamente karta kondusaun ba ema na’in-neen,” Diretór Nasionál Transporte Terrestre Viqueque, Elvino da Cruz, hateten, hafoin distribui karta kondusaun iha resintu Administrasaun munisípiu Viqueque, tersa ne’e.

Kritériu rejista karta kondusaun, motorista sira tenke lori dokumentu sira hanesan kopia kartaun eleitorál koloridu, foto 3×4 tahan rua, atestadu médiku hosi saúde munisípiu Viqueque, selu iha banku $15 inklui tuir teste eskrita no tama roda.

Tuir planu parte DNTT Viqueque sei loke filafali inskrisaun ba karta kondusaun iha fevereiru 2023, enkuantu iha janeiru sei halo verifikasaun ba motorista sira ne’ebé seidauk tuir teste tama roda.

“Tuir loloos sira na’in 78 horiseik no ohin bele tama roda ona, maibé Polísia sira utiliza fatin tama roda iha Beskem. Despois hotu maka ami hamutuk ho Tránzitu Viqueque hodi fó teste ba motorista sira ne’ebé rejistan antes ne’e,” nia akresenta.

Notísia relevante: DNTT Viqueque fó teste eskrita karta kondusaun ba membru PNTL 20

Tuir dadus, motorista sira ne’ebé tuir ona teste hamutuk 648, kompostu hosi feto 118 no mane 530, enkuantu seidauk tuir teste karta kondusaun 78.

Iha biban hanesan, Segundu Komandante Polísia Nasionál Timor-Leste (PNTL) Viqueque, Afonso dos Reis, husu ba motorista sira ne’ebé hetan ona karta kondusaun, bainhira kondús tenke lori ho di’ak.

“Bainhira ita-boot sira lori lori motór no kareta la akompaña ho karta kondusaun, maka sei hasoru membru Tránzitu iha terrenu no tenke koopera. Tanba ne’e, ha’u husu ba populasaun munisípiu Viqueque bainhira sai bá munisípiu seluk tenke lori karta kondusaun no lori transporte tuir regra rodoviáriu,” nia hameno.

Atribuisaun karta kondusaun ne’e hosi Administradór munisípiu Viqueque, Januário Soares ‘Bolly’, akompaña hosi Segundu Komandante PNTL Viqueque inklui funsionáriu administrasaun sira.

Jornalista    : Vitorino Lopes da Costa

Editora         : Julia Chatarina

iklan
iklan

Leave a Reply

iklan
error: Content is protected !!