BAUCAU, 12 marsu 2024 (TATOLI) – Servisu Munisipál Programa Nasionál Dezenvolvimentu Suku (PNDS) Baucau hosi Governu atu aumenta transporte liuliu motorizada nune’e apoia funsionáriu sira bainhira halo serbisu iha baze.
Diretór Servisu Munisipál PNDS Munisípiu
Baucau, Amaro Gusmão Gama Fernandes, esplika, situasaun refere fó impaktu ba funsionáriu sira tanba difikulta bainhira halo monitorizasaun projetu ka atividade iha kada suku tanba motorizada seidauk sufisiente.
“Transporte la sufisiente, tanba funsionáriu barak liu transporte, dalaruma ba terrenu ema na’in-rua uza motor ida maibé ba fatin ne’ebé la hanesan,” Diretór Servisu Munisipál PNDS Baucau hateten iha Vila Nova, tersa ne’e.
Totál funsionáriu atuál iha PNDS Baucau hamutuk 78, enkuantu transporte motorizada ne’ebè iha foin 48, kompostu karreta rua no motorizada 46 nune’e PNDS Baucau sei presiza tan apoia motorizada nune’e bele kontrola projetu sira-ne’ebé implementa iha munisípiu Baucau.
“Ami-nia fasilitador oras nee balun laiha transporte motorizada,” Amaro Fernandes akresenta.
PNDS Baucau iha tinan-2024 hetan alokasaun orsamentu $2.667.250,00 hodi implementa programa regulár iha suku 59 hanesan reabilitasaun estrada, reabilitasaun irrigasaun, konstrusaun eskola inklui konstrusaun moru protesaun ba sentru saúde.
Jornalista : Natalino Belo
Editór : Evaristo Soares Martins
