BOBONARO, 19 marsu 2024 (TATOLI)-Diresaun Servisu Munisipál Saúde, Autoridade Munisípiu Bobonaro, iha tempu badak sei distribui ai-moruk Albendazole ba labarik sira hodi prevene lumbriga iha labarik sira-nia kabun.
Diretor Servisu Munisipál Saúde, Autoridade Munisípiu Bobonaro, Gíl Bernardo Viçente, esplika labarik ne’ebé alvu atu simu ai-moruk ne’e hahú hosi idade tinan 6 to’o 14.
Notísia relevante: RAEOA lansa distribuisaun ai-moruk albendazole atu prevene moras lumbriga
“Agora daudaun ita komesa ona halo advokasia iha kada fasillidade saúde hotu aban ka bainrua ne’e komesa ona halo distribuisaun ba ita-nia alin estudante sira,” nia informa ba jornalista sira iha Maliana, tersa ne’e.
Biban ne’e nia husu ba estudante alvu sira atu koopera ho ekipa saúde,tanba ai-moruk ne’e di’ak ba ema-nia saúde.
“Ai-moruk lumbriga ne’e ajuda tebes, atu fase ka hasai tiha lumbriga sira-ne’e,” nia akresenta.
Tuir planu, atividade ne’e sei implementa ba eskola sira iha postu administrativu neen hanesan; Atabae, Balibo, Cailaco, Maliana, Bobonaro no Lolotoe.
Notisia relevante: Prevene lumbriga, Estudante Viqueque na’in-19.000 sei simu ai-moruk albenazol
Jornalista: Sérgio da Cruz
Editór: Evaristo Soares Martins
