DILI, 22 Marsu 2024 (TATOLI) – Ministériu Agrikultura, Pekuária, Peska no Floresta (MAPPF) husu ba guarda florestál sira ne’ebé serbisu ho forma voluntária durante fulan tolu tenke kompleta dokumentu sira molok asina kontratu serbisu.
Sekretáriu Estadu Floresta, Fernandinho Vieira, hatete dokumentu ne’ebé presiza kompleta hodi prepara sira-nia kontratu ba dahuluk mak haree sira-nia termu referénsia serbisu, konta bankária no diploma eskola.
“ Ministériu Agrikultura nia ekipa avaliasaun remata-ona avalisaun no presiza dokumentu balun hodi prepara kontratu no job description ba sira. Parese iha fulan-Marsu ka tarde liu iha Abríl sira sei asina sira-nian kontratu”, Governante informa, iha resintu edifísiu Tatoli Faról.
Daudaun, guarda florestál sira kontinua serbisu ho voluntáriu tanba sira-nia kontratu remata iha 31 Dezembru 2023, maibé haree ba papél guarda nian importante atu asegura rikusoin iha Timor-Leste. Ministériu sei kontrata guarda florestál sira ne’e liuhusi avaliasaun ba komportamentu mós.
“Guarda florestál ne’ebé serbisu ho voluntáriu, Governu nafatin konsidera hodi selu sira-nia saláriu. Molok atu selu saláriu sei halo koordenasaun ho xefe departamentu no diretór sira”, nia asegura.
Pesoál guarda florestál Covalima, Hermino Tilman, dadaun ne’e manda ona dokumentu hanehsan fotokópia billeti identidade, konta bankária ba Diresaun Floresta nasionál. “Ami submete dokumentu bazeia ba orientasaun. Hafoin submete dokumentu, nia kontinuasaun ami hein de’it desizaun husi nasionál”, nia salienta.
Xefe Departamentu Reflorestasaun Territóriál no Planta Industriál Covalima, Domingos Gusmão, seidauk iha informasaun katak guarda florestál na’in-22 presiza kompleta dokumentu sira, tanba ne’e kompeténsia husi Diresaun Nasionál Floresta.
“Ha’u labele ko’alia konaba asuntu guarda floresta atu kompleta tan dokumentu saida de’it, tanba prosesu administrativu hotu sentraliza iha nasionál, la’ós iha munisípiu”, dehan.
Guarda florestál iha territóriu hamutuk 304, husi númeru ne’e balun permanente no seluk hanesan kazuál.
Notísia relevante: SEF hakarak buka dalan asegura kontratadu guarda florestál
Jornalista: Celestina Teles
Editora: Maria Auxiliadora
