DILI, 25 marsu 2024 (TATOLI)—Governu liuhosi Sekretaria Estadu Ensinu Sekundáriu Jerál (ESJ) no Ensinu Tékniku Vokasionál (ETV) komunika ona Adidu Edukasaun Indonézia iha Timor-Leste hodi haree akordu iha área edukasaun hodi ajusta ho planu Eskola Sekundáriu Tékniku Vokasionál (ESTV).
“Ita halo ona diskusaun ho parte Edukasaun Indonézia nian atu estabelese akordu ida kona-ba oinsá atu fó formasaun hodi kapasita profesór sira-ne’ebé hanorin iha Tékniku Vokasionál no fó formasaun iha área produsaun no peska nian. Husi diskusaun ne’e, ba oin ita bele asina akordu hodi haree ba área hirak ne’e,” Diretór Jerál Ensinu Sekundáriu Jerál, Deolindo da Cruz, hateten ba jornalista sira, iha salaun VIP Ministériu Edukasaun, Villa Verde, segunda ne’e.
Notísia relevante : Eskola ESTV 28 Novembru menus profesór
Nia konsidera, formasaun ne’e importante tanba Timor-Leste iha kafé barak no hanesan produtu potensiál, tanba ne’e presiza hatene halo produsaun, jestaun no asegura kuda kafé.
“Estabelesimentu akordu ne’e hodi hasa’e kualidade ensinu,” nia akresenta.
Aleinde ne’e, presiza mós dezenvolve kursu peska nian tanba jeografikamente tasi Timor luan.
“Ikan no produtu seluk barak maibé eskola tékniku vokasionál ba área ida-ne’e sei menus tebes. Tanba ne’e mak ita hakarak iha akordu ho Edukasaun Indonézia nian iha sentru ne’ebé mak lokaliza iha Jawa hodi fó ona formasaun ba ema barak, liu-liu iha área tékniku sira no área produsaun, ho nune’e mak ita hakarak halo akordu ida-ne’e atu ba oin sira bele fó formasaun ba ita-nia profesór sira iha área tékniku nomós produsaun nian,” Diretór tenik.
Iha fatin hanesan, Education and Cultural Attaché Indonézia, Phil Ikhfan Haris, hateten, iha enkontru ne’e parte rua ko’alia kona-ba oinsá atu hasa’e kualidade edukasaun iha Timor-Leste nomós fasilita profesór ESTV ba tuir formasaun iha Indonézia.
“Tanba ami hatene, iha Timor daudaun ne’e konsentra hela hodi hasa’e kualidade edukasaun nian, tanba ne’e iha Malang iha sentru ida iha área formasaun ba kada komponente hotu, ne’ebé ohin ita hasoru malu atu ko’alia kona-ba buat hirak-ne’e no oinsá ami atu fasilita profesór sira husi Tékniku Vokasionál ne’e ba apreende liután área tékniku no produsaun,” nia katak.
Sentru formasaun akumula profesór barak ona iha área oin-oin, liu-liu área produsaun no tékniku nian.
“Tanba ne’e, sira hakarak Timor-Leste mós ba apreende iha ne’ebá kona-ba tékniku no produsaun. Maibé husi diskusuan ohin ne’e ami sei filafali ba fatin hodi haree planu ka akordu ida uluk ne’e atu ajusta fali planu ba iha parte superiór iha governu rua ne’e nian no planu hirak ne’e, ami sei hatudu fali ba parte superiór husi Governu rua ne’e bainhira aseita ona mak ami sei estabelese akordu,” nia tenik.
Jornalista : Osória Marques
Editora : Julia Chatarina
