DILI, 26 marsu 2024 (TATOLI)—Ministériu Edukasaun (ME) la konsege ezekuta orsamentu $2.417.974,49 hosi programa bolsa méritu iha tinan 2022, hosi totál alokasaun $7.545.824,49 ba benefisiáriu 12.809.
“Osan ne’e fila ba kofre Estadu tanba la ezekuta hotu, iha benefisiáriu balun la kompleta dokumentu, tanba ne’e ita tenke fó fila. Orsamentu Estadu labele rai hodi hein to’o ezekuta hotu,” Diretór Jerál Ensinu Sekundáriu Jerál, Deolindo da Cruz, hateten ba Agência Tatoli, iha ninia knaar fatin, iha Vila Verde, tersa ne’e.
Governu ezekuta ona $5.127,850 ba benefisáriu 9.170, kompostu husi ezekusaun iha faze dahuluk ba benefisiáriu 5.853 ho totál osan $3.314.100, faze daruak ba benefisiáriu 1.671 ho osan $923.550, no etapa datoluk ba benefisiáriu 1.646 ho osan $890.200.
“Governu la aloka osan iha tinan ne’e, sei tau planu iha tinan 2025 tanba presiza koordena ho parte jurídiku sira, nune’e labele akontese fallansu ruma liga ho dokumentu,” nia akresenta.
Notísia relevante : BNCTL halo ona pagamentu ikus ba benefisiáriu bolsa méritu 1.600-resin
Iha fatin ketak, Diretór Eskola Sekundáriu Jerál Prezidente Nicolau Lobato iha Soibada-Manatuto, Joanico Ulha da Costa, hateten, eskola ne’e iha benefisiáriu na’in-ualu.
“Iha benefisiáriu na’in-rua mak simu ona direitu no na’in-neen seidauk simu. Ami haruka ona benefisiáriu na’in-neen ninia dokumentu bá Ministériu Edukasaun maibé to’o agora ami seidauk rona nia progresu kona-ba ida-ne,” Diretór Eskola informa via telefónika.
Nune’e, nia husu atu parte kompetente sira aselera pagamentu bolsa méritu ba alunu ne’ebé seidauk simu.
“Ne’e sira-nia direitu. Inan no aman sira mai halo reklamasaun beibeik iha eskola maibé ami la hatene bainhira mak Ministériu Edukasaun bele selu,” nia akresenta.
Nune’e mós, Diretór Eskola Ensinu Báziku Sentrál (EBC, sigla portugés) 10 Dezembru Nicolau Amaral iha Comoro, relata, iha estudante na’in-tolu mak sai benefisiáriu ba programa bolsa méritu maibé ida de’it mak simu.
“Benefisiáriu sira feto hotu. Na’in-rua ne’e la kompleta dokumentu nune’e suspende tiha maibé loron seluk sira nafatin iha direitu hodi asesu. Sira-ne’e hetan subsídiu iha tinan 2023 no tuir informasaun ne’ebé iha katak tinan ne’e bolsa méritu laiha ona, maibé husu ba Ministériu Edukasaun atu buka polítika ida atu estudante na’in-rua mós bele asesu bolsa méritu,” nia tenik.
Estudante finalista iha tinan 2022 ne’ebé tama iha mellór klasifikadu hodi hetan bolsa méritu ne’e, sira-nia valór foti husi ezame nasionál ne’ebé realiza ona iha loron 24 to’o 26 outubru 2022 liubá no husi valór sira-ne’e mak determina estudante ne’e bele asesu programa bolsa méritu.
Bolsa méritu destina ba estudante ensinu báziku terseiru siklu nono ano no ensinu sekundáriu désimu segundu ano, ne’ebé sei foti de’it sira-nia valór hosi ezame nasionál no nota husi eskola nian sei la soma hamutuk ho nota husi ezame nasionál nian.
Estudante ne’ebé hetan klasifikasaun di’ak hosi nivel nasionál ne’e sei foti de’it ema na’in-tolu hosi primeiru klasifikadu to’o terseiru klasifikadu, enkuantu husi nível munisipál primeiru to’o kintu lugar iha ema na’in-lima, hafoin hosi nível eskolár sei foti hosi primeiru to’o terseiru klasifikadu hamutuk ema na’in-tolu.
Kritériu ba estudante ne’ebé atu hetan bolsa méritu tenke hetan aproveitamentu eskola di’ak hahú hosi nono ano iha terseiru siklu ensinu báziku no désimu segundu ano ensinu sekundáriu jerál.
Atribuisaun bolsa méritu ba estudante mellór klasifikadu ne’e hetan ona aprova iha lei Grandes Opções do Plano (GOP) husi Parlamentu Nasionál, hafoin ministériu tutela ezekuta hodi hasai dekretu-lei ho númeru 35/2022 husi diploma ministeriál númeru 43/2023 ho ninia medida sira.
Jornlista : Osória Marques
Editora : Julia Chatarina
