VIQUEQUE, 27 marsu 2024 (TATOLI)— Feto sira iha suku Uma-Uain Leten, Postu Administrativu Viqueque Vila, munisípiu Viqueque, iha inisiativa halibur malu no harii “Grupu Buka Took”, hodi hala’o atividade produsan mina nuu atubele konsome no bá fa’an komsumidór sira-ne’ebé presiza.
Iha tinan 2021, Feto potensiál iha suku referidu halibur malu no tau hanoin hamutuk hodi harii “Grupu Buka Took”. Molok estabelese grupu ne’e sira hetan formasaun hosi Catholic Relief Service (CRS-sigla inglés) iha área prosesamentu mina nuu, oinsá prodús sai ba mina konsomu ne’ebé di’ak no garante ba kualidade. Maibé la konsege halo produsaun mina tanba ekipamentu ka mákina dulas nuu laiha.
Daudaun, Feto ne’ebé envolve aan iha Grupu Buka Took na’in-13 no hetan mós apoia hosi mane na’in-tolu ne’ebé taa-ai no sa’e nuu sira.
“Ami prodús mina nuu konsomu iha loron 8 fulan-Novembru tinan 2023, tanba hetan apoia ekipamentu makína dulas nuu husi CRS. Daudaun ami kontinua konsolida maluk feto-sira hodi tein mina nuu konsomu ne’ebé kada semana ida, ami tein dala ida litru 10 no dala ruma to’o litru 15. Rezultadu mina ne’e balun ami faan no balun ami uza ba komsumu loro-loron”, Koordenadóra Grupu Buka Took, Dorteia Gusmão Ranjel, hateten ba jornalista sira, iha suku Uma Uain-Leten, ohin.
Grupu Buka Took ho ninia produtu mina nuu konsomu ne’ebé prodús ho manuál kada mina litru lima fa’an ba dolar hitu ($7) no litru ida ho folin dolar ida ($1). Durante ne’e abitante iha Uma Uain Leten laran maka sosa hodi uza ba konsomu.
Totál reseita rekolla hosi Novembru 2023 to’o agora hamutuk $170. Tanba osan labele rai de’it maibé sosa fali ba produtu sira hanesan señora no ai-lia atu uza ba misturasaun mina nuu hodi labele i’is lalais no sosa mós kombustivél hodi ense ba mákina dulas nuu maran.
“Reseita ida-ne’e motiva ami hodi hasa’e produsaun no ami fiar katak sei hadi’a ami-nia ekonómia familiar. Ami mós kria ona regra ida katak rendimentu ne’ebé grupu hetan sei fahe ba membru sira kada tinak”, Koordenadora ne’e afirma.
Kona-ba dezafiu, líder Grupu Buka Took, afirma dezafiu mak daudaun ne’e makína ida aat, nune’e hela makína dulas nuu ida ne’ebé produsaun ba mina nuu komesa menus ona, maske kontinua hala’o produsaun.
“Ba oin hakarak dezenvolve di’ak liután produsaun mina nuu konsomu tanba grupu mós iha rasik nuu hodi prodús ba mina.
Notísia relevante: Mina Nuu Puru TL Tama Ona Merkadu Doméstiku
Jornalista : Vitorino Lopes da Costa
Editór : Florencio Miranda Ximenes
