BOBONARO, 16 abríl 2024 (TATOLI)-Vise Ministru Obra Públika, ba Asuntu Infraestrutura, Julio do Carmo, tersa ne’e, orienta ona kompaña Internasionál PT Hutama Karya hodi sobu projetu konstrusaun drainajén ne’e sira kosntrui ha área kruzamentu Memo no Tunubibi suku Tapo Memo tanba deskobre materiál kontrusaun drainajén ne’e laiha kualidade.
“Sira uza tiha ona raihenek Soso, kuze metru 50 ne’ebé ohin ita sobu fila fali, sira mos konkorda tiha ona, maibé ohin seidauk sobu tanba sira-nia trabalhadór libur, neʼebé segunda dia 17 mak sira mai sobu sai ida raihenek Soso nia, ita indika fali sira tenke uza Raihenek Cailaco nian, tenke fase halo moos mak uza,” nia informa ba jornalista sira hafoin observa diretamente kontrusaun projetu ne’e iha terenu, tersa ne’e.
Tuir rezultadu teste laboratóriu sertifika katak kompañia bele foti fatuk no mota Soso no mota Nunura hodi halo kontrusaun drainajén, maibé ba raihenek obrigatóriu tenke foti husi rai-henek hosi postu administrative Cailaco nian.
Notísia Relevante:PAM Bobonaro dúvida ho rai-henek ne’ebé Hutama Karya uza ba projetu dreinajen iha Maliana
Iha oportunidade ne’e, Governante ne’e husu ba empreza konstrutora atu koopera ho autoridade munisipál, lider komunitária no entidade relevante sira hodi garante katak obra ne’e la’o ho susesu no hatudu kualidade di’ak.
Sorin seluk, Sekretariu Autoridade Munisipál Bobonaro ba asuntu Planeamentu no Investimentu, Semedo Laco, apresiza ba asaun ne’ebé governu halo tanba durante ne’e públiku kestiona maka’as kona-ba kualidade projetu konstrusaun ne’e.
“Kompañia internasionál ida mak ka’er projetu, maibé foin hahú de’it ami preokupa ona ko-naba materiál, raihenek ne’e la tama iha padraun, ami iha ne’e ema halo uma privadu ka projetu ki’ik sira ne’e mos rai-henek Soso ne’e ita la autoriza para atu foti, agora kompañia ne’e mai dehan rai-henek ne’e tama fali standar ne’e ami duvida ho ninia kualidade, iha ne’e so di’ak mak iha Cailaco ho Balibo,” nia hateten.
Jerente Tekniku PT Hutama karya, Swandy Simanjuntak, hateten empreza kumpre desizaun no promete iha tempu badak sei orienta traballadór sira sobu fila-fali drainajén ne’ebé antes ne’e konstrui ona tanba utiliza rai- henek Soso.
Jerente Tekniku ne’e eesklarese sira uza rai-henek Soso bazeia ba rezultadu teste labóratoriu dahuluk priense duni kriteria atu uja hodi halo kosntrusaun ba projetu drainajén ne’e.
“Ita hare ho matan rai-henek Soso ne’e tahu nakonu, kor Coklat mais di’ak, maibé bazeia ba rekomendasaun hosi Obra Públika ami sei troka materiál Soso ba fali Cailaco no agora ami uza ona maze menus loron 10, loos duni rai-henek Cailaco di’akliu Soso,”Nia afirma
Enkuantu projetu ne’e nudar faze dahuluk molok konstrui Estrada Urbana Maliana villa hosi diresaun Soso ba to’o Ponte Nunura ho distansia kilometru sia no projetu ne’e sei gasta orsamentu $21, 228.762.00 ho durasaun kontratu tinan ida fulan neen.
Notísia Relevante:Rai-henek ne’ebé Hutama Karya uza ba projetu dreinajen Maliana, hein rezultadu teste hosi ADN
Jornalista: Sergio da Cruz
Editor: Agapito dos Santos
