iklan

EKONOMIA, BOBONARO, HEADLINE, MUNISÍPIU

Rai-henek ne’ebé Hutama Karya uza ba projetu dreinajen Maliana, hein rezultadu teste hosi ADN

Rai-henek ne’ebé Hutama Karya uza ba projetu dreinajen Maliana, hein rezultadu teste hosi ADN

Empreza internasionál PT Hutama Karya, fakar ona rai-henek iha fatin projetu estrada urbana Maliana Vila hodi konstrui dreinajen diresaun Soso ba Tunubibi, suku Tapo-Memo. Imajen Tatoli/Sérgio da Cruz.

BOBONARO, 09 abríl 2024 (TATOLI) –  Rai-henek ne’ebé kompañia internasionál Hutama Karya atu uza ba projetu dreinajen estrada urbana Maliana hosi diresaun Tunubibi, suku Tapo-Memo sei hein rezultadu teste hosi ekipa tékniku Ajénsia Dezenvolvimentu Nasionál (ADN).

Diretór Servisu Obra Públika Munisípiu Bobonaro, Marcelino Gonçalves Godinho, hateten rai-henek hosi mota Soso ne’ebé empreza internasionál Hutama Karya utiliza latuir padraun tanba ladún kualidade, fo’er no nakonu ho tahu.

Notísia relevante: PAM Bobonaro dúvida ho rai-henek ne’ebé Hutama Karya uza ba projetu dreinajen iha Maliana

“Ita halo supervizaun ba materiál ne’ebé uza tuir standar (padraun) ka espesifikasaun ne’ebé mak iha, ne’e mak ami hamutuk ho Prezidente Autoridade Munisípiu Bobonaro halo intervensaun,” nia ko’alia iha edifísiu administrasaun munisipál Bobonaro, tersa ne’e.

Nia dehan, projetu ne’e paradu hela tanba hein rezultadu teste laboratóriu hosi sampel rai-henek Soso ne’ebé ekipa tékniku hosi Ministériu Obra Públika no Ajénsia Dezenvolvimentu Nasionál (ADN) foti ona iha semana liubá.

“Ita hein rezultadu mak ita foin rekomenda ba kompañia atu refere liu ba materiál lokál ne’ebé ita rekomenda ba tuir dadus laboratóriu, maibé ita prefere liu rai-henek hosi Cailaco (la’ós rai-henek hosi mota Soso). Ida-ne’e mak ita hakarak hetene liu, ita la’ós ko’alia ba asumsi, maibé ita ko’alia ho data mak ita rekomenda, iha tempu badak data ne’e sai, ita sei enkontru ho kompañia atu kontinua fali servisu,” nia hateten.

Nia dehan, ba oin Diresaun Servisu Munisipál Obra Públika sei koordena ho Diresaun Jerál Estrada Ponte, atu kontinua superviziona no monitoriza projetu refere nune’e implementasaun bele la’o ho susesu tuir regra ne’ebé iha atubele fasilita komunidade asesu estrada ho di’ak.

Enkuantu projetu ne’e nudar faze dahuluk molok konstrui estrada urbana Maliana Vila hosi diresaun Soso ba to’o ponte Nunura ho distánsia kilómetru sia no projetu ne’e sei gasta orsamentu $21,228.762.00 ho durasaun kontratu tinan ida fulan-neen.

Notísia relevante: Empreza Hutama Karya hahú reabilita estrada Maliana

Jornalista   : Sérgio da Cruz
Editór          : Evaristo Soares Martins

iklan
iklan

Leave a Reply

iklan
error: Content is protected !!