iklan

EKONOMIA, BOBONARO, HEADLINE, MUNISÍPIU

Empreza Hutama Karya hahú reabilita estrada Maliana

Empreza Hutama Karya hahú reabilita estrada Maliana

Ekipamentu pezadu hosi PT Hutama Karya, hahú ke’e rai hodi implementa projetu reabilitasaun estrada urbana Maliana Vila, munisípiu Bobonaro. Imajen Tatoli/Sérgio da Cruz.

BOBONARO, 05 fevereiru 2024 (TATOLI) – Empreza Konstrutora PT Hutama Karya, Segunda, tuku 14:00 ne’e hahú implementa projetu reablitasaun estrada urbana Maliana Vila, munisípiu Bobonaro hodi fasilita movimentasaun transporte públiku no privada.

Jestór Projetu PT Hutama Karya, Wahyu Hertianto, esplika, projetu refere faze primeiru hahú hosi área Soso ba to’o Ponte Nunura ho distánsia kilómetru sia.

Notísia relevante: Governu hatuur fatuk dahuluk ba projetu estrada urbana Maliana

“Ami hahú servisu primeiru halo dreinajen (saluran), hotu tiha mak ba iha faze servisu hadi’ak dalan, tanba prinsípiu hosi hadi’a dalan, primeiru tenke hadook-aan hosi volume bee, tanba bainhira udan mai saluran laiha, entaun estrada bele aat lalais,” nia ko’alia iha Maliana, segunda ne’e.

Jestór Projetu PT Hutama Karya, Wahyu Hertianto. Imajen Tatoli/Sérgio da Cruz.

Nia hatutan, empreza deside hahú ho rute hosi Soso ba ponte Nunura tanba estrada iha área refere kuaze aat hotu, hafoin ne’e kontinua ba kapitál Maliana ho totál distánsia maizumenus kilómetru 18.

“Ami hakarak hahú iha-ne’e tanba movimentu transporte ladún maka’as, la hanesan ho iha sidade laran, bainhira klima di’ak, ita sei kontinua book-aan ba fali iha sidade laran, hahú hosi Soso ba bundaran Maliana, lurus sa’e ba Santa Cruz to’o Igereja, depois merkadu Maliana, Raimaten ho Odomau,” Wahyu hateten.

Wahyu Hertianto lori empreza nia naran agardese ba konfiansa ne’ebé Governu Timor-Leste fó no husu komunidade sira, autoridade lokál no entidade hotu iha munisípiu Bobonaro espesialmente postu administrativu Maliana atu apoia másimu atubele finaliza obra refere tuir kontratau ne’ebé iha.

Paulino Teti Mau nu’udar abitante Maliana senti orgulu no apresia ba esforsu tomak ne’ebé Governu halo no espera atak empreza konstrutora bele hala’o servisu ho reponsablidade tuir tempu ne’ebé determina ona.

“Ami kontente tanba durante tinan naruk komunidade Maliana halerik ba estrada, depois kuaze tinan ida ona tau fatuk dahuluk, ohin loron konsege realiza duni projetu ne’ebé mak komunidade sira hein, ita hotu espera katak buat hotu sei la’o ho di’ak,” nia katak.

Enkuantu obra refere sei gasta millaun $21-resin ($21,228,762.00) ho durasaun kontratu tinan ida fulan neen.

Notísia relevante: MOP altera dezeñu estrada Maliana pista rua

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!