OÉ-CUSSE, 19 Abríl 2024 (TATOLI) – Koordenadór Zona Ekonómika Espesiál Dezenvolvimentu Oé-Cusse Ambeno (ZEEDOA), João Mendes Gonçalves, sujere ba empreza Iron Fortune Pty Ltd. atu loke postu traballu ba Oé-Cusse ona sira iha atividade prospesaun no peskiza ba rekursu minerál metáliku.
“Ha’u hato’o votu susesu ba kompañia, husu atu serbisu hamutuk ho ita-nia populasaun, husu mós atu kompleta saida maka ita-nia lei sira hateten kona-ba komponente lokál, kria postu traballu ba Oé-Cusse oan sira iha peskiza ne’e”, João Gonçalves ko’alia iha ámbitu serimónia atribuisaun lisensa ba Iron Fortune atu halo prospesaun no peskiza ba minerál metáliku, ne’ebé realiza iha otél Ambeno, Oé-Cusse, ohin.
Koordenadór ZEEDOA ne’e salienta katak nia mós sei halo estudu hodi estabelese Zona Espesiál Ekonómia Sosiál Dezenvolvimentu iha Oé-Cusse Ambeno atu sai mós portavós ida ba iha povu Oé-Cusse.
Gonçalves husu mós ba empreza atu utiliza ekipamentu no transporte ne’ebé emprezáriu lokál sira iha, nune’e bele fó oportunidade para dezenvole ekonomia iha iha Oé-Cusse. “Rekomendasaun sira-ne’e maka ha’u hato’o ba empreza ne’ebé hetan tiha ona direitu hodi hala’o serbisu esplorasaun minerál iha Oé-Cusse”, nia dehan.
Iha biban ne’e, Diretór-Ezekutivu empreza Iron Fortune Pty Ltd., Ross Brown, promete sei serbisu hamutuk ho suku ne’ebé sai alvu ba prospesaun no peskiza minerál metáliku iha Rejiaun Adminsitrativa Espesiál Oé-Cusse Ambeno (RAEOA).
“Ami sei esforsu hodi serbisu hamutuk ho ita-boot sira durante atividade ne’e la’o. Ami iha esperansa boot atu hetan depózitu minerál ekonómiku, ne’ebé sai hanesan prioridade boot iha futuru durante ami-nia kompañia halo esplorasaun. Ami haree no foku liu ba área envolvimentu komunidade lokál, liuhusi kriasaun postu serbisu direita no indireita”, nia promete.
Tuir nia, la’ós ne’e de’it, maibé mós dezenvolvimentu abilidade sira husi programa sira hanesan treinamentu no envolvimentu negósiu lokál nian.
Emprezáriu internasionál ne’e relembra katak, iha tinan 14 liubá, ekipa boot ida hosi Iron Fortune ho nia dirijente sira halo vizita dahuluk mai Timor-Leste, iha tempu ne’ebá hafanun sira no iha inisiativa mosu iha ulun katak asaun saida maka bele halo iha Timor-Leste ba rikusoin sira iha rai-laran.
“Ohin loron, Timor-Leste sai hanesan juridikasaun ba esplorasaun minerál foun nian iha mundu, maibé menus husi esplorasaun no nakonu ho konfiánsa boot, tan ne’e Iron Fortune sei foku liu ba iha esplorasaun ouru ka osan-mean, manganés, osan-mutin no seluk tan”, nia saliénta.
Tanba ne’e, Iron Fortune agradese ba Governu Timor-Leste no rai Timór, tanba fó ona fiar no lisensa atu serbisu hamutuk no promete katak sei hakruuk ba lei ne’ebé iha Konstituisaun atu hamutuk dezenvolve minerál rai-laran no dezenvolve Oé-Cusse sai furak liután.
Tuir dadus husi ANP, área ba atividade prospesaun no peskiza minerál metáliku iha Oé-Cusse iha rua, alvu mak sei kobre ouru ka osan-mean, manganés no osan-mutin.
Fatin dahuluk lokaliza iha sub-rejiaun Pante Makasar, iha suku Taiboko, aldeia Maquelab, Ulas, Nemun no Hauboni, no envolve mós sub-rejiaun Nítibe husi Suni-Ufe, aldeia Cabana, Fuabano no Oélcaem, suku Usitaku iha aldeia Nítibe no Kuantua, suku Lela-Ufe iha aldeia Hau-Ufe ho área konsesaun MEL2023-CA-ZG004.
Fatin daruak, iha sub-rejiaun Nítibe iha suku Ban-Afi, aldeia Kuanobe no Hau-Tefo, envolve mós sub-rejiaun Pássabe, iha suku Abani, aldeia Haemnanu, Pássabe no Naetuna, inklui sub-rejiaun Oésilo iha suku Bobometo, aldeia Quibiselo no Tumin, suku Usiataqueno, iha aldeia Nibin ho área konsesaun MEL-CA-ZG007.
Notísia relevante:Autoridade RAEOA rekomenda halo tuir kultura molok halo peskiza ba rekursu minerál
Jornalista: Abílio Elo Nini
Editora: Maria Auxiliadora
