BOBONARO,14 maiu 2024 (TATOLI) – Implementasaun pojetu reablitasaun sede suku Holsa, postu administrativu Maliana, munisípiu Bobonaro, daudaun ne’e progresu fíziku atinje ona 75%.
“Ha’u atu hateten loos ninia progresu to’o 75% ne’e foin kompleta fulan ida, nia faze agora dadaun hela de’it mak odamatan no janela,” Xefe suku Holsa, António Santa Cruz, informa ba jornalista sira iha Maliana, tersa ne’e.
Nia observa obra referida bele finaliza lato’o dateline projetu ho durasaun fulan-haat, tanba badaen sira badinas tebes aselera serbisu.
“Hela de’it 25% atu finaliza, maibé ida-ne’e fila-fali ba badaen sira-ne’ebé halo serbisu, ha’u-nia observasaun katak ne’e lato’o tempu ne’ebé determina, tanba foin fulan ida de’it atinje ona 75%,” nia katak.
Nia agradese ba VIII Governu no IX Governu ne’ebé konsege tau planu no implementa duni projetu ne’e hodi hodi responde ba preokupasaun durante ne’e.
Sede suku Holsa iha espasu sufisiente atu akumula funsionariu suku foun na’in-haat hodi halo serbisu, tanba iha tinan 2022 estudante estajiadu Universidade Nasionál Timor-Leste (UNTL) konstrui tan sala rua ne’ebé nia fundu 75% mai husi estajiadu 100-resin no 25% fundu suku nian.
“Ha’u prepara antes tiha ona, sede suku Holsa iha kuarta haat salaun ida, ami sei koloka sira, ha’u atu hateten sira na’in sei iha fatin, depois sira sei hamutuk ho Ekipa Jestaun Suku (EJS) PNDS nian, ami-nia planu ba oin Ofisiál Polísia suku (OPS) mós sei hamutuk ho ami iha fatin ne’e,” nia hateten.
Enkuantu obra Reabilitasaun Sede Suku (RSS) tinan 2024 husi Programa Nasionál Dezenvolvimentu Suku (PNDS) iha suku Holsa gasta osan ho montante $11,976.00 no orsamentu ne’e mai husi OJE tinan 2023.
Notisia relevante: Espasu sede suku la sufisiente atu akumula ofisiál foun na’in-haat
Jornalista: Sérgio da Cruz
Editór: Evaristo Soares Martins
