BOBONARO, 02 maiu 2024 (TATOLI)-Líder komunitária sira iha munisípiu Bobonaro, preokupa ho espasu sede suku atuál ne’ebé governu konstrui no halo reabilitasaun foin lalais ne’e, tanba la sufisiente atu akumula ofisiál suku foun na’in haat ne’ebé iha tempu badak Ministériu Administrasaun Estatál sei koloka hodi apoia serbisu administrasaun suku.
Xefe suku Lour, postu administrativu Bobonaro, Miguel Gomes Lopes, agradese no apresia ba polítika IX Governu Konstituisionál, tanba ho prezensa funsionáriu suku foun na’in haat ne’e bele fasilita no mellora di’ak liután administrasaun suku ne’ebé durante ne’e la’o lenta.
Maibé nia senti tristes no preokupa, tanba espasu sede suku iha de’it kuartu ka sala rua.
Notísia relevante: SMARU simu ona lista kandidatu ne’ebé konkorre vaga ba pesoál apoiu suku
“Ita-nia sede suku iha timor laran tomak ne’e ho modelu ida de’it, iha de’it sala rua, ha’u hanoin ita atu akumula ema na’in-haat ne’e hau hanoin difisil, depois espasu sala ne’e mos ninia medida ki’ik-oan,” nia informa ba Tatoli iha Bobonaro, kinta ne’e.
Nia dehan, tuir loloos molok halo rekrutamentu governu liuhosi Mininstériu Administrasaun Estatál tenke kria uluk kondisaun ne’ebé adekuadu liuliu aumenta espasu iha sede suku.
“Atu nune’e bele tau ekipamentu, nune’e sira bele halo servisu ho di’ak, se la’e ha’u hanoin servisu ida-ne’e komplikadu oituan tanba fatin sede suku ne’e kloot los,” nia katak.
Xefe suku Raitabou, postu administrativu Maliana, Maximiano dos Santos Araújo, husu ba governu atu haree kestaun ne’e tanba sede suku ho sala rua de’it ne’e la sufisiente duni ba funsionariu foun ne’e atu halo servisu.
“Sira na’in haat ne’e idak-idak iha ninia kna’ar no responsablidade, agora sei mai mak ita ne’e hanesan kahur malu ho komunidade, hau la hatene servisu ne’e atu la’o halo nusá, tanba sede suku ne’e iha sala rua, ida ba xefe suku no ida ba administrasaun nian,” nia hateten.
Kestaun ne’e, Xefe suku Maximiano hato’o ba autoridade munispál Bobonaro liuhosi enkontru Konsellu Koordenasaun Munisipál, maibé seidauk bele aumenta espasu ida sede suku,ntanba madatalan projetu Reablitasaun Sede suku (RSS) hosi Programa Nasionál Dezenvolvimentu Suku la fó dalan atu aumenta sala.
“Pasiénsia funsionárių foun sira mai ne’e ami koloka iha sala ne’e de’it ona,” nia katak.
Enkuantu iha tempu badak Ministeriu Administrasaun Estatál liuhosi Autoridade Munisipál sei koloka funsionariu suku foun hanesan Sekretaria suku, Finansa, Administrasaun no Ofisiál ba Asuntu Sosiál hamutuk 200 hodi ba apoia servisu iha suku 50 ne’ebé eziste iha munisípiu Bobonaro.
Notísia relevante: Xefe Suku Maumeta uza osan rihun $16 konstrui sede suku andar
Jornalista: Sérgio da Cruz
Editór: Evaristo Soares Martins
