DILI, 28 maiu 2024 (TATOLI)—Profesór na’in-40 (husi profesór 480) ne’ebé foin lalais simu ona pose hodi destaka iha eskola 330 menus profesór, iha territóriu tomak, hato’o ona karta lamentasaun ba Ministériu Edukasaun (ME).
“Depoisde ita halo sira-nia termu aseitasaun iha loron 14 maiu, loron tuir mai loos duni iha profesora barak ne’ebé mai hato’o lamentasaun kona-ba sira-nia situasaun, liu-liu ba sira-ne’ebé iha oan nurak, oan ki’ik-oan, no isin rua, entaun ami halo flexibilidade ida tuir lei katak ita utiliza modalidade transferénsia no destakamentu, sira ne’e purvolta 40 pessoas,” Diretora Nasionál Rekursu Umanu iha ME, Anita Tavares de Jesus, informa iha ninia knaar fatin, Vila Verde, kuarta ne’e.
Anita Tavares dehan, hafoin simu karta husi profesora sira, katak sira bele troka kategoria ne’ebé hanesan.
“Ida-ne’ebé isin-rua, sira ne’e ita koloka besik ba sentru saúde atu sira bele kontrola saúde. Tanba momentu ita koloka, ita la hatene ida-ne’ebé mak isin-rua no ida-ne’ebé mak iha oan kiik, maibé depoisde kolokasaun sira lubuk ne’ebé mai halo lamentasaun ho karta ne’ebé sira iha, entaun ami halo kolokasaun filafali, sira lamenta ita koloka tuir fali lamentasaun ne’ebé iha, tanba ita hakarak sira ba flexibilidade no seguru,” nia esplika.
Notísia relevante : ME koloka ona profesór 480 ba eskola 276 iha territóriu tomak
Nune’e, kolokasaun hirak-ne’e iha hotu nia iha suplementu subsídiu maibé sei diferente ho kolokasaun entre munisípiu no postu administrativu.
“Sira-nia suplementu subsídiu iha maibé la hanesan, iha dekretu-lei númeru 31 ne’e ko’alia katak subsídiu entre munisípiu no postu iha maibé la hanesan, entaun ida-ne’e ita sei halo prosesu, tanba ne’e sei iha kolokasaun hela. Depois sira-ne’e sei iha mós subsídiu alojamentu mak hanesan uma laiha, ita sei iha subsídiu alojamentu,” nia akresenta.
Kona-ba sira-nia saláriu, bainhira sira serbisu ona fulan-ida, depois diretór eskola sira aprezenta lista prezensa mai ME maka halo prosesu ba sira-nia saláriu nune’e mós ba subsídiu transporte.
Jornalista : Osória Marques
Editora : Julia Chatarina
