OÉ-CUSSE, 11 juñu 2024 (TATOLI) –Provedór Diretiu Humanu no Justisa (PDHJ), Virgílio da Silva Guterres, ‘Lamukan’, tersa ne’e observa Ospitál Referénsia Oé-Cusse (HRO, sigla portugés), laiha problema kona-bá estoke ai-moruk, fasilidade no atendimentu ba pasiente sira.
Notísia relevante: Prezidente Autoridade RAEOA deteta problema lima iha Hospital Referénsia Oé-Cusse
Provedór Virgílio da Silva Guteres, informa, objetivu vizita ne’e atu haree direitamente situasaun iha ospitál RAEOA nian, atu responde ba preokupasaun públiku iha nasionál kona-bá situasaun setór saúde daudaun enfrenta kona-bá estoke ai-moruk sira.
“Ohin ha’u haree no rona esplikasaun iha ospitál, eskritóriu no armazein ai-moruk nian, husi esplikasaun sira-ne’e, ba ha’u iha esperansa tanba iha RAEOA laiha estoke-out ai-moruk iha armanzein, tantu iha ospitál ai-moruk iha hela,” Virgílio da Silva Guterres, ba jornalista sira hafoin vizita ofisiál ne’e.
Nune’e, nia agradese tanba iha parte ospitál mós iha medida atu enfrenta situasaun emerjénsia liuliu atu halo koordenasaun ho ospitál nasionál no ospitál referál seluk, bele fó apoia, ho mekanizmu balun atu halo aprovizionamentu ba ai-moruk sira no hato’o ba iha INFPM kuandu rezerva ai-moruk iha ne’e menus no laiha.
“Jeralmente ami bele dehan, ohin haree parte sala emerjénsia ninian, sala internamentu, pediátria sala maternidade ninian atendimentu di’ak, ita haree pasiente ladún barak, iha pediátria nia ohin kosok-oan ida de’it mak iha, ita haree situasaun di’ak tanba taxa moras iha ne’e redusivu la’ós barak,” nia katak.
Sekretáriu Rejionál ba Asuntu Saúde, Luís de Jesus Neno, agradese tanba ho vizita PDHJ, bele observa hodi identifika direita kona-bá situasaun ba serbisu saúde iha Hospital Referál oé-Cusse.
“Tanba durante ne’e issue barak, katak ospitál Oé-Cusse hasoru hela problema estoke-out ai-moruk, maibé realidade ohin mai haree laiha, tanba ita iha ona kontratu ho INFPM, kada trimestre sira distribui ai-motuk mai Oé-Cusse bazea ami-nia pedidu, tan ne’e mak ami agradese sira mai iha-ne’e, atu observa no haree direita,” nia orgullu.
Notísia relevante: Estoke ai-moruk iha armazein Hospital Referénsia Oé-Cusse sufisiente
Atu rekorda fali katak, iha fulan-fevereiru tinan 2024 ne’e, Autoridade RAEOA, liuhusi Sekretáriu Rejionál ba Asuntu Saúde selebra kontratu ho Institutu Nasionál Farmasia Produtu Médiku (INFPM), hodi fornese ai-moruk ba Hospital Referénsia Oé-Cusse durante tinan ida nian, ho kustu $511,000.00.
Jornalista: Abílio Elo Nini
Editór: Evaristo Soares Martins
