DILI, 03 Jullu 2024 (TATOLI) – Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, husu ba Komandu Unidade Espesiál Polísia (UEP) atu hala’o nafatin serbisu ho responsabilidade hodi garante estabilidade iha territóriu, liuliu iha kapitál.
Komisáriu Polísia Henrique da Costa dehan UEP mak sai hanesan liman loos ba komandu jerál nian, tanba ne’e nia halo vizita iha UEP hodi haree besik saida maka sira prepara ona.
“Ha’u hala’o vizita urjente ida mai iha kampaun komandu Unidade Espesiál Polísia nian iha Bairru Pité ne’e ho intensaun atu haree direta sira-nia prontidaun no preparasaun sira oinsá bele responde ba kualkér situasaun sira ne’ebé akontese iha nasaun ne’e”, Henrique da Costa dehan ohin.
Hanesan komisáriu jerál sei fó orientasaun espesiál ruma ba komandu UEP ne’e atu bele hala’o serbisu hodi garante seguransa iha territóriu, liuliu iha Dili hodi hatudu liután prezensa PNTL nian iha fatin públiku sira, nune’e viziblidade Polísia iha komunidade nia leet.
“Ita lakohi komandu UEP ne’e hein de’it bainhira problema ruma akontese maka foin tuun bá hala’o atuasaun, maibé ita hakarak sira-nia prezensa ne’e tenke másima iha komunidade nia leet”, dehan.
Tanba ne’e ,presiza muda tátiku komandu nian hodi tau desizaun ruma atu koloka membru sira iha terrenu durante oras 24 nia laran, nune’e bele prevene molok akontese problema. Tanba iha Dili ne’e kuaze ema barak mak konsentra no presiza duni intervensaun komandu UEP nian atu asegura situasaun sira ne’e.
“Ha’u orienta ona sira iha dadeer no kalan tenke halo movimentasaun iha estrada públika sira, nune’e viziblidade polísia”, afirma.
Komandante UEP, Superintendente Polísia Damião Correia, haktuir katak vizita Komandante Jerál nianiha UEP ne’e surpreza, tanba hakarak haree duni komandu ne’e iha duni preparasaun ka la’e. UEP prontu nafatin iha oras 24 nia laran nu’udar forsa espesiál ho tarrefa ne’ebé iha prontu iha kualkér situasaun bainhira komandu jerál presiza bele responde kedan.
Komandu UEP halo ona mudansa ba tarrefa serbisu sira kona-ba oinsá atu hala’o atuasaun ka intervensaun ba situasaun ruma emerjénsia ne’ebé akontese iha kapitál nomós iha territóriu. Husi mudansa ne’e komandu UEP ho polísia rezerva ka task force sira sei serbisu hamutuk atu halo vijilánsia iha kapitál durante oras 24 nia laran.
“Uluk kuandu situasaun perigu ruma maka akontese iha kapitál, polísia task force mak tuun uluk bá halo intervensaun no kuandu sira labele ona maka husu apoiu UEP. Maibé, agora muda ona UEP ho task force serbisu hamutuk bainhira akontese problema ruma iha kapitál hodi hamutuk hala’o atuasaun”, realsa.
Jornalista: Tomé Amado
Editora: Maria Auxiliadora
