DILI, 09 jullu 2024 (TATOLI)—Sekretaria Estadu Kooperativa (SEKoop) daudaun koordena ona ho Ministériu Agrikultura Peska, Pekuária no Floresta (MAPPF) hodi halo produsaun integradu iha munisípiu Covalima, iha tinan oin mai.
“Produsaun integradu ne’e importante tebes tanba fatin ida de’it maibé bele halo buat barak hanesan kuda modo, hakiak animál no seluk tan hodi bele kontribui ba ekonomia rai-laran,” Sekretáriu Estadu Kooperativa, Arsénio Pereira da Silva, informa iha Akait, tersa ne’e.
Produsaun integradu ne’e halo iha rai Estadu iha suku Beco, postu administrativu Suai, munisípíu Covalima ho totál rai ektare 300.
“Parte SEKoop sei kuda Bafo Kayrala, hakiak animál sira no seluk tan, enkuantu parte MAPPF sei apoiu fini, traktór , apoia téknika no seluk tan,” nia akresenta.
Notísia relevante : KONSSANTIL sujere ba MAPPF aloka orsamentu sufisiente hodi hasa’e produsaun alimentár
MAPPF mós hahú halo ona diskusaun planu no programa prioridade ba tinan 2025 nian, liuhusi kada diresaun sira diskute foku ba programa iha área importante haat mak hanesan área agrikultura nian tenke hasa’e produsaun hare no batar, iha setór pekuária hasa’e produsaun animál, tau-matan ba animál sira labele hetan moras, inklui reforsa mós produsaun karau susu-been.
Jornalista : Arminda Fonseca
Editora : Julia Chatarina
